Lamtumirë Profesor!

(Kontributi dhe vepra juaj, do të kujtohet dhe shqiptohet gjithmonë, me krenari)

Ka veçse pak ditë, që vdekja ndau nga jeta kolegun dhe mikut tonë të mirë, matematicienin e njohur, Prof. Dr. Abdyl Haxhimusain. Kjo humbje e parakohshme, ka prekur së tepërmi dhe ka hidhëruar thellë të gjithë ata, që e kanë njohur nga afër dhe kanë punuar me profesor Dylin, si koleg e pedagog i sa e sa brezave, përmbi dyzet vjet me radhë.

Prof. Dr. Abdyl Haxhimusai, gati në të gjithë jetën e tij-ai lindi në Elbasan, më 9 qershor 1942, ka kontribuar me profesionalizëm të lartë në arsim, në mënyrë të veçantë në universitet, duke dhënë shembullin e spikatur të një matematicieni kualitativ, me kërkesa të larta ndaj vetes; dinjitoz e shumë serioz në punë dhe në marrëdhënie mjaft të mira me kolegët dhe studentët e tij.

Në mënyrë të veçantë profesor Dyli, ka dhënë kontribut të jashtëzakonshëm në formimin dhe konsolidimin e departamentit të matematikës, nga pikëpamja organizative, shkencore  e metodike.  Për një legjislaturë, ai  ka udhëhequr këtë departament me mjaft aftësi dhe seriozitet, duke bashkëpunuar në mënyrë produktive me të gjitha fakultetet inxhinierike të Universitetit Politeknik; për të hartuar kurrikula bashkëkohore të disiplinave matematike, për formimin bazal të inxhinierëve të ardhshëm.

Prof. Dr. Abdyl Haxhimusai është hartues i mjaft teksteve mësimore universitare, që prej dekadash të tëra gjenden dhe janë vënë në shërbim të studentëve të profileve inxhinierike, në të gjitha trojet shqiptare. Në procesin e tij të kualifikimit, ai ka realizuar mjaft punime shkencore brenda dhe jashtë vendit duke sjellë në auditorët universitare eksperiencat bashkëkohore për studentët e vet. Me profesionalizëm dhe kulturë të gjerë, ai ka kontribuar në procesin e kualifikimit shkencor, në udhëheqjen e doktoraturave të mjaft asistentëve të rinj.

Me korrektësinë që e karakterizonte, Prof. Dok. Abdyl Haxhimusai, ishte gjithmonë i kërkuar në ambiente kolegësh dhe studentësh për fisnikërinë, seriozitetin dhe dashamirësinë që ai dinte të ofronte. Profesor Dyli, dallohej në departament për metodikën si lektor i afirmuar dhe i kërkuar nga universitetet publike apo private edhe në trojet shqiptare. Përveçse një profesor i nderuar e mjaft i respektuar nga miqtë e kolegët, ai ishte ndërkohë dhe një baba e bashkëshort shembullor. Dyli ishte pjesë e pandarë e takimeve tona të përhershme shoqërore e miqësore dhe me sensin e tij të përshtatjes dhe arsyetimeve logjike, ai shpesh bëhej protagonist i takimeve, bisedave dhe debateve tona.

Ne miqtë e tij, shprehim keqardhje e dhimbje të thellë që, tashmë, Prof. Dr. Abyl Haxhimusai do të na mungojë fizikisht. Ai ishte nga ata të pakt njerëz të dalluar e të shquar, që me përkushtim punoj për disa dekada, ndryshe përmbi 40 vjet, në edukimin shkencor të brezit të ri, duke dëshmuar kualitet profesional të admirueshëm, hulumtues i të rejave shkencore, lektor i klasit të lartë me një performancë shumë të mirë, duke rrezatuar dije dhe kulturë të gjerë për breza të tërë. Ndaj për veprën dhe kontributin e çmuar, Abdyl Haxhimusai do të mbetet një shembull i gjallë për ne dhe brezat që ka edukuar. Janë me qindra e mijëra kuadro të lartë, që sot kujtojnë me shumë respekt punën plot pasion, këshillat shumë të vlefshme, qëndrimet dinjitoze dhe marrëdhëniet shumë funksionale me profesor Dylin-siç e thërrisnin atë studentët.

Për familjen dhe të afërmit, kolegët dhe të gjithë studentët, për të cilët Prof.Dr. Abdyl Haxhimusai fali nga hera një pasuri të çmuar vlerash. Emri, kontributi dhe puna e tij do të kujtohet e shqiptohet gjithmonë me respekt e krenari.

Nënshkruar: Akademik, Rektor i Universitetit Politeknik, Prof. Dr. Jorgo Koçani; Prof. Osman Kraja; Prof. Aleko Minga; Prof Dr. Jorgo Malita; Prof. Dr.  Shpëtim Leka; Prof. Kujtim Dedei; Prof. Dr. Shpëtim Bozgo; Prof. Dr. Vladimir Jorgji; Prof.Dr. Kristaq Filipi; Prof. Dr. Omer Stringa; Prof. Dr. Bashkim Ruseti; Prof. Dr. Edmomd Panariti; Prof. Dr. Fatos Klosi; Prof. Dr. Forcim Softa; Prof. As. Luigj Gjoka; Dr. Fredi Premti.