Gugash Magani nuk do të jetë më trajner i Teutës, e cila do të drejtohet nga italiani Roberto Sorrentino. Trajneri peqinase nuk është larguar për shkak të rezultateve të dobëta, por për shkak të ndryshimeve të fundit në shoqërinë aksionare të klubit durrsak, me afrimin e Gea Sport. Është pikërisht kjo kompani sportive, e cila, në kuadër të këtij bashkëpunimi që lidhet me afrimin e lojtarëve të ndryshëm cilësorë, kryesisht nga Brazili, ka kërkuar edhe ndryshimin e trajnerit. Pasuesi i Maganit do të jetë Sorrentino, ish-portier, i cili ka qenë ndihmëstrajner te Juventus për katër vjet, në periudhën 1991-95, një vit nën drejtimin e Xhixhi Maifredit dhe më pas nën drejtimin e Xhovani Trapatonit. Lajmi është konfirmuar nga vetë presidenti i Teutës, Edmond Hasanbelliu, i cili theksoi se ndarja me Maganin ka qenë pa probleme dhe se ish-trajneri do të paguhet nga klubi në bazë të kontratës që ka. Teuta mban vendin e dytë në renditje, por dy ndeshjet e fundit, nën drejtimin e Maganit, kanë qenë humbje, me Kastriotin në Durrës dhe Partizanin në Tiranë.