Laura kërkon transparencë, Rama: Rilindje për t’i çliruar të rinjtë nga Saliu

Selia blu lëshon një tjetër deklaratë nëpërmjet të cilës i kërkon kreut të PS-së transparencë për pasurinë e tij. Zëdhënësja e PD-së, Laura Vorpsi, tha se kryesocialisti Rama nuk ka paraqitur faturat e pasurisë, pavarësisht se kjo i kërkohet prej 10 javësh.

“Prej 10 javësh, Rama ka trilluar dhe shpifur për çdo gjë dhe nuk ka paraqitur asnjë faturë tatimore për pallatin në pajë duke dëshmuar që s`ka paguar asnjë qindarkë. Prej 10 javësh Rama s`ka deklaruar asnjë pasuri të nënës dhe të djalit të tij, siç e detyron ligji pasi mendon se ai dhe familja e tij janë mbi ligjin”, tha zëdhënësja Vorpsi.

Më tej, në deklaratë thuhet se Rama duhet të mos i fshihet transparencës por të zbardhë të vërtetën e pasurisë së familjes së tij.

“Partia Demokratike i bën thirrje z. Rama të mos i fshihet transparencës, të marrë guximin dhe të thyej heshtjen e tij dhe të përmbushë detyrimin e tij ligjor si person publik dhe politik e të zbardhë plotësisht të vërtetën e këtyre skandaleve korruptive personale dhe familjare.

Partia Demokratike fton z. Rama të mos harrojë se heshtja e tij e zgjatur flet më shumë se pallati 5 katësh 900 metër katrorë, se 100 milionë lekë kredi pa interes, se sa çmimi 2 dollarë i rezidencës së tij verore në Malin e Dajtit, të cilat e shoqërojnë atë çdo ditë në çdo takim, në çdo zotim, në çdo mashtrim deri në kutinë e votimit!”, thuhet në deklaratë.

Reagon Rama

Ndërkohë, pak minuta më pas, Rama ka reaguar nëpërmjet Tuiterit. “Sa herë Saliu flet përmes Laurës del qartë se Shqipëria duhet të rilindë për të çliruar edhe Laurën e gjithë të rinjtë demokratë nga Saliu!”, shkruan kryesocialisti në profilin e tij.