Lazarati në mediat e huaja: Policia hyn në “mbretërinë e kanabisit”

Aksioni i policisë në Lazarat ka zënë vend sot në mediat ndërkombëtare. Washington Post dhe Associated Press përshkruajnë operacionin e së hënës për hyrjen dhe vendosjen e ligjit në fshatin ku prej vitesh kultivohet lirshëm marijuanë.

Washington Post shkruan se  gjatë aksionit të policisë në fshatin e marijuanës, bandat vendase kanë sulmuar trupën e policisë me granatahedhëse, mortaja dhe mitralozë. Washington Post thekson se nuk është raportuar për të lënduar gjatë sulmit në fshatin në jug të Shqipërisë ku mendohet se prodhohet kanabis me vlerë 4.5 miliardë euro në vit.

“Rreth 500 policë me armatim të lehtë, përfshirë dhe oficerë të forcave speciale e rrethuan fshatin brenda natës, pas të shtënave në këtë fshat gjatë fundjavës, nga të cilat  u plagos një fshatar i Lazaratit. Policia shqiptare do të vazhdojë aksionet kundërprodhuesve të drogës në këtë fshat për ta çliruar Lazaratin nga bandat kriminale që veprojnë atje”, shkruhet ndër të tjera në këtë shkrim të Washington Post.

Edhe mediat italiane i kanë kushtuar hapësirë lajmit për hyrjen e policisë në Lazarat. Agjencia e lajmeve, ANSA, e përshkruan si “skenë lufte” operacionin e uniformave blu, të cilat hasën në rezistencën e armatosur të banorëve.

Ndërsa gazeta franceze “Le Soir” shkruan se më në fund, policia ka arritur të futet në “mbretërinë e kanabisit”.

“Policia shqiptare ka nisur të hënën në mëngjes një operacion kundër fshatit Lazarat, 240 km në jug të Tiranës, një zonë e vogël e njohur si “mbretëria e kanabisit”, por banorët kanë hapur zjarr ndaj policisë. Disa fshatarë kanë përdorur mitralozë të rëndë dhe armë antitank për të ndaluar hyrjen e forcave të rendit në fshat, ka thënë policia në një deklaratë për shtyp. “Rreth 500 policë janë vendosur rreth fshatit të Lazaratit dhe janë gati të ndërhyjnë për të shkatërruar fushat me kanabis” ka shtuar I njëjti burim. “Policia është e vendosur ta vazhdojë operacionin”, vazhdon komunikata. Sipas burimeve në vendngjarje, të shtëna me armë janë dëgjuar gjatë gjithë natës së të dielës deri të hënën në rajonin e Gjirokastrës, ku gjendet fshati Lazarat me 2200 banorë. Sipas një raporti të policisë italiane, ky fshat prodhon 900 tonë kanabis në vit me një vlerë të përllogaritur në shitje prej 4.5 miliardë euro, ose gati 1 e treta e produktit të brendshëm bruto të vendit”, shkruan Le Soir.