Leku fiton pikë ndaj euros

Monedha vendase ka marrë pak frymë lirisht gjatë javës që lamë pas, pasi prej mëse tre javësh kishte qenë nën presione nënçmuese. Sipas kursit zyrtar të publikuar nga Banka e Shqipërisë, të premten një euro u këmbye me 140.22 lekë, nga 140.27 lekë që ishin hapur raportet e këmbimit të hënën, ndërkohë që java e kaluar ishte mbyllur në kuotat e 140.31 lekëve. Në raport me dollarin, monedha vendase u nënçmua të premten, megjithatë ajo e mbylli javën në kuota më të larta në krahasim me të hënën, kur këmbehej me 103.19 lekë. Në tregjet ndërkombëtare, dollari këmbehej me $1.3614 për euro nga $1.3609 dje. Monedha amerikane pritet të jetë e dobët, teksa pritet që shefja e Rezervës Federale, Janet Yellen, të dëshmojë para ligjvënësve javën e ardhshme, ndërsa tregtuesit kanë vënë bast se banka qendrore do të rrisë normën e interesit. Në tregun e brendshëm, sipas aktorëve të tij, kërkesa për valutë është zbehur disi, dke reflektuar tendencën sezonale, ndërkohë që prurjet nga turizmi kanë filluar rritjen, ndonëse janë ende të dobëta, për shkak se pushuesit nga Kosova, që përbëjnë pjesën më të madhe të turistëve në vend kanë shtyrë pushimet për shkak të muajit të Ramazanit.