Për “mikun tim” Alimadhi

Muharrem Xhafa*

Nuk kisha ndërmend të bëja replikë tjetër me ballistin Alimadhi, jo pse e mendoja “të vdekur”, po sepse thashë që çështja u la me aq! Por nuk paskej qenë kështu! Alim….adhi, si në gjumë, kujtohet t’i thotë gazetarit të “Dita-s”: Pse gjallë qenka ky Muharrem Xhafa? Po, po, Alim….adh, gjallë jam dhe i gatshëm në çdo moment! S’e besoj, po a thua ta kesh harruar “ndeshjen” e vitit të kaluar ne TV-News 24 për LANÇ-in, kur ti në “ring” merrje fryme me zor, se nuk dije si t’i mbroje ballistët?!

Përse ti, “miku im”, je i mërzitur e i zemëruar?! Për ato që të kam thënë në replikën e parë në lidhje me ballistët?! Apo për ato që po të thonë, si përfaqësues i keq i ballistëve, komunistë e veteranë, figura të shquara të LANÇ-it?! Apo për të gjitha?

Alimadh, të ka zënë lemeria, ndaj duhet të qetësohesh, se edhe tradhtia e ballistëve është e thellë! E, që të të “ikë” zemërimi, ti duhet të pranosh të vërtetën, jo se kjo ndreq ndonjë gjë, po se ti “pastron” shpirtin tënd! (Si ti duhet të bëjë edhe Andrea Stefani me qëndrimin që ka shfaqur ditët e fundit lidhur me shtrembërimin e qëllimshëm që u bën të vërtetave të mëdha të luftës sonë antifashiste dhe për denigrimin e rolit të PKSH dhe Enver Hoxhës në atë luftë).

Ja, unë po të ndihmoj, duke të përsëritur, se je i zemëruar “jo me komunistët”, po me ballistët, me ata që bënë tradhtinë kombëtare dhe bashkëpunuan me fashizmin, të lanë ty “dobiçin” në dorë! Po ty s’ta mban të deklarosh se ballistët ishin bashkëpunëtorë të pushtuesve italianë e të nazistëve gjermanë, ishin vënë në krah e në shërbim të tyre kundër çlirimit të Atdheut e të popullit shqiptar! Ty nuk ta mban të thuash të vërtetën se, ashtu si e meritonin, ata u likuiduan bashkë me pushtuesit e huaj nazifashistë dhe morën arratinë për të vdekur si qentë në shërbim të reaksionit ndërkombëtar! Por ke edhe një mllef tjetër: Që Enver Hoxha, për shkak se ballistëve, që qenë bashkëpunëtorë të fashizmit e tradhtarë të Atdheut të vet, nuk u dha pushtet, nuk e ndau me ta pushtetin, siç e kërkonin! Ishte Enver Hoxha ai, Adriatik!

Pas gjithë kësaj tradhtie, si ta zë goja, Alimadh, ta quash partinë e ballistëve të lavdishme?!! Çfarë duhej të bënte ajo tjetër për t’u quajtur parti e tradhtarëve?! Partia e Ballit Kombëtar është po aq “e lavdishme” sa tradhtia e saj, është po aq “e lavdishme” sa është “e lavdishme” një parti kolaboracioniste, vegël mbështetëse e nazi-fashizmit!

Lemeria që të ka kapur nuk do të të lëshojë lehtë, se të lemerisur e në panik morën rrugët e botës të parët e tu të llahtarisur nga frika e Nacionalçlirimtares! A ke lexuar se çfarë thotë CIA për ata? Në një prej dokumenteve të publikuar këto ditë thuhet se “fitorja e komunistëve në vitin 1944 bëri që shumë liderë të Ballit të largoheshin nga Shqipëria”. Në një tjetër thuhet se “prej krijimit të tij dhe disa vite më tej, kryesia e Ballit ishte në duart e themeluesve konservatorë si Mit’hat Frashëri… të cilët e konsideronin partinë e tyre si një aleancë të të gjithë elementëve antikomunistë dhe jo si një parti politike me program e ideologji”! Lexoje me qetësi, Alimadh: “jo parti politike me program e ideologji”! Me tej në një tjetër shkruhet se “CIA analizon, zbardh përçarjet brenda Ballit Kombëtar dhe se Hasan Dosti ishte njeri i dështuar për amerikanët”!

Një njeri në krizë e i lemerisur ngjan me një të damllosur, që i ka “mbushur brekët” dhe ashtu si ti i bën thirrje pushtetit të borgjezisë të izolojë mendjet “kriminale” të komunistëve e veteranëve, të ushtrojë terror kundër tyre, të dënojë krimet e komunizmit! Alim… borgjezia nuk ka se për çfarë krimesh t’i dënojë komunistët, se komunistët nuk kanë bërë krime, se ata, përkundrazi, ishin vendimtarë për çlirimin e botës nga murtaja fashisto-nazisto-militariste, së cilës ballistët i shërbenin me shpresa të mëdha për t’i vënë në pushtet! Pushteti i borgjezisë, që ty të ka nën sqetull, do t’i kishte sakatuar një e nga një komunistet, po të kishin bërë krime, po të kishin lyer duart me “gjak shqiptari”, siç thua zotrote! Alimadh, ju u dënuat me meritë nga PKSH, populli e ligjet e tij për shkak se i lyet duart me gjak shqiptari si gjatë LANÇ-it edhe pas çlirimit të vendit, më 29 nëntor 1944. Pushteti popullor ishte ai që ju kapte në ajër e ju shtypte si mizat në tokë!

Tjetër gjë që ti ke frike ta shkruash, po kudo në botë janë dënuar bashkëpunëtoret e nazi-fashizmit si tradhtarë të popullit e të Atdheut të vet! A nuk ka ndodhur kështu në SHBA, në Angli, në Francë, në Rusi, në Gjermani, gjithandej?! Mos u anko që ka ndodhur kështu edhe në Shqipëri?! Ja, unë po ta kujtoj edhe një herë, jo se ti nuk i di këto gjëra, se ti ke bërë shkollën e socializmit dhe ke qenë nxënës i zellshëm në studimin e mësimeve të shokut Enver, po se i shmangesh së vërtetës historike, siç përpiqesh të mbulosh me “gjethe fiku” bashkëpunimin me pushtuesit nazifashistë të Ballit Kombëtar! Ndaj si mbrojtës i qëndrimeve e i krimeve të bëra nga bashkëpunëtorët e fashizmit, ju nuk keni të drejtë morale të flisni për ndjenja njerëzore, për humanizëm, për unitet kombëtar! Ju edhe flisni edhe bëni të kundërtën, sepse ky është misioni juaj! PKSH ju doli hakut gjatë LANC-it e më pas për t’ju kthyer në rrugën e duhur, por ballistët Ballit e kishin vendosur rrugën e turpit! Prandaj komunistët nuk mund të pajtohen me mendimet tuaja të mykura, me përbaltjen e historisë, me shpifjet e gënjeshtrat kundër komunizmit e komunistëve! Ju keni mbetur edhe sot mjeranë të mentalitetit te bashkëpunëtoreve të pushtuesve të huaj!

Mund edhe të mos jesh i vetmi shqiptar ose i vetmi ballist që thua se partizanët shqiptarë, të inkuadruar në njësitë e ushtrisë se rregullt nacionalçlirimtare shkuan ne Kosovë jo për të çliruar trevat shqiptare atje, po për të vrarë atdhetarët më të mëdhenj e për t’ia nënshtruar trevat shqiptare Serbisë! As vetë pushtuesit gjermanë nuk e kanë thënë këtë gjë, Alimadh! E, nga që të ka plasur damari i ballit të ballistit, ti pyet se kush janë pra tradhtarë ata, komunistët, partizanët apo ballistët?! Ore, Alim…adh! Edhe ajo pak frymë që të ka mbetur, ti punon ta vesh në shërbim të serbëve e të neonazifashistëve?! Ok që je profan në njohjen e LANÇ-it, por këto i thua sepse nuk mund të rrini pa qenë në shërbim të të huajve, pa kryer detyra prej bashkëpunëtorësh të regjimeve të huaja!

Me që po bën rolin e sherrbudallait, po të kujtoj se dy brigada të Ushtrisë Nacionalçlirimtare Shqiptare, e Pesta dhe e Treta, kishin kaluar kufirin shtetëror të Shqipërisë, që nga 5 tetori 1944, pra para çlirimit të vendit, për të luftuar kundër nazistëve gjermanë në Kosovë dhe në bashkëpunim me forcat lokale partizane atje, morën pjesë në luftën për çlirimin e Prizrenit e të Gjakovës e më pas të Ferizajt e të Drenicës. Me krijimin e Divizionit të Pestë, me ato brigada u bashkua edhe brigada e 25-të. Je i vockël ti ballist të mohosh faktin që forcat e këtij divizioni luftuan heroikisht krah për krah me partizanët kosovarë e me njësi të Ushtrisë Nacionalçlirimtare të Jugosllavisë për çlirimin e krejt Kosovës, të Sanxhakut e Bosnjës Jugore e betejë pas beteje deri në Vishegrad. Po mos harro të kujtohesh se edhe një divizion tjetër i Ushtrisë Nacionalçlirimtare Shqiptare, Divizioni i Gjashtë, u nis nga Shkodra në fillim të dhjetorit 1944, kaloi në ndjekje të gjermanëve nëpër Mal të Zi, për dalë pastaj në Bosnjën Jugore. S’është mirë për ty si shqiptar të mohosh që në luftimet që u zhvilluan përtej kufijve shtetërorë nga dy divizionet shqiptare, ranë dëshmorë mbi 600 djem e vajza të reja, duke treguar me jetën e tyre e me gjakun që derdhën dashurinë për liri, shpirtin internacionalist të popullit shqiptar e antifashizmin e tij të vendosur. Po të freskoj kujtesën se vetëm në brigadat partizane të Divizionit të Pestë u inkuadruan mbi 2000 djem kosovarë dhe mijëra të tjerë në njësitë partizane kosovare e më gjerë. Adriatik, a kishit ju ndonjë kompani (jo më shumë) që luftonte kundër pushtuesve gjermanë për çlirimin e Kosovës? Ok, e di që partizanët shqiptarë në Kosovë nuk i deshën nazistët pushtues dhe sivëllezërit e ballistëve, çetnikët, bashkëpunëtorë të nazistëve gjermanë!

Dëshpërimi ju ka shtyrë të thoni marrina, që as mendja e pushtuesve nuk i pranon! Ju thoni që komunistët fituan për shkak të sinqeritetit vëllazëror që Balli kishte ndaj partizanëve?! A je në vete? Për çfarë sinqeriteti e keni fjalën, për sinqeritetin e ballistëve ndaj pushtuesve nazi-fashistë? LANÇ-i u fitua nga partizanët nën udhëheqjen e PKSH e të Komandantit të Përgjithshëm, Enver Hoxhës, u fitua nga populli shqiptar, në përleshje të përgjakshme kundër pushtuesve te huaj dhe bashkëpunëtorëve të tyre ballistë, zogistë e të reaksionit shqiptar e jo për shkak të sinqeritetit të Ballit apo të tjetërkujt! Se Balli nuk ka qenë kurrë i sinqertë! Ai e kërcente “vallen” sipas muzikës së pushtuesve dhe ç’thoshte sot nuk thoshte nesër! Jo rastësisht PKSH dhe Enver Hoxha vendosën ta godasin Ballin në pikën më të dobët të tij, qe ishte çështja e luftës me armë pa rezerva kundër pushtuesve të huaj, duke qenë se ai në të vërtetë ishte kundër saj.

Si ti, që nuk ke lënë gjë pa thënë kundër komunistëve e veteranëve, me një fjalor të egër si fjalori i një krimineli, ankohesh kur veteranët e komunistët thonë se ju jeni akoma armiq, tradhtarë e bashkëpunëtorë të pushtuesve! Ne nuk do t’jua kujtonim çfarë “malli” i kalbur keni qenë, nëse do të rrinit në punët tuaja! U bënë 25 vjet që nuk ju pushoi një herë goja se vjelluri kundër PPSH, Enver Hoxhës, socializmit! Ne ngrihemi kundër jush, sepse ju jo vetëm flisni, po edhe veproni për të errësuar, për të zhvlerësuar e për të fshirë rolin e LANÇ-it, të PKSH-së dhe të Enver Hoxhës, historinë kombëtare, doni t’i paraqisni pushtuesit nazifashistë miq, emancipues dhe partizanët veteranë “kriminelë”! Veteranët s’kanë nevojë për fjalët e mia, se ata kanë vetë gojë e guxim të flasin dhe penë të shkruajnë, siç jam i bindur që do të ta “thyejnë” samarin e ballistit kolaboracionist! Duan apo nuk duan ballistët e soji i vet, veteranët janë vlerë e artë e kombit dhe nuk mund t’i tallë e t’i nëpërkëmbë askush, as PS-ja e askush tjetër, siç bën ti diversion! Mos u gëzo para kohe, se ata nuk janë aspak në perëndim, siç i etiketon ti, për arsye se vepra e tyre nuk perëndon kurrë! Ndaj mos ngatërro veprën e partizanëve dhe veteranëve heroikë, çlirimin e Atdheut e vendosjen e pushtetit popullor, me veprën e perënduar, që më 29 nëntor 1944, të ballistëve e të Ballit Kombëtar. Se bashkë me nazizmin, fashizmin e militarizmin të humbur janë bashkëpunëtorët e fashizmit! Ndërsa komunizmi, që rron në gjithë botën, rron edhe në Shqipëri! Po të përsëris se qenë komunistët ata të cilët e udhëhoqën fitoren e Luftës së Dytë Botërore, bashkë me forcat e tjera antifashiste botërore!

Punë e tij, po unë nuk arrita të kuptoj përse Alimadhi i kthehet edhe një herë në intervistë çmendurisë së tij që gjatë LANÇ-it janë vrare “zero italianë e zero gjermanë”, duke u përbetuar edhe më fort kësaj radhe se po thotë të vërtetën dhe flet me fakte e dokumente, ndonëse pa sjellë qoftë edhe një dokument të vetëm! Alimadhi bën në intervistën e dytë një pelivanllëk të trashë, që e nxjerr bllof e gënjeshtar, kur thotë se gjatë LANÇ-it nuk janë vrarë “zero italianë e zero gjermanë”, po 136 italianë e gjermanë?! Ku i gjeti ai këta 136 të vrarë italianë e gjermanë, në cilat dokumente e në cilat arkiva?! E “çuditshme” kjo kthesë, po edhe këta të vrarë qenkëshin vrarë për arsye të tjera?! Për cilat arsye, Alimadh? Perse nuk i thua, që t’i dijë e t’i verifikojë edhe opinioni?!

Bij të ndershëm e realistë ballistësh, më thoshin disa shokë, i kanë tërhequr vëmendjen Aliut për gënjeshtrat e publikuara në intervistat e tij, prandaj ai ka bërë një “manovër”, duke përmendur 136 të vrarë, duke thelluar me tej gërshetin e gënjeshtarit! Po sjell në vëmendjen e lexuesit, ndonëse dihet, që, populli shqiptar gjatë LANÇ-it luftoi e fitoi kundër dy fuqive pushtuese të huaja, Italisë fashiste e Gjermanisë naziste, që pushtuan vendin tonë njëra pas tjetrës, si edhe kundër qeverive kuislinge e reaksionit të brendshëm e të forcave të tyre të armatosura.

Pa folur për dëmet e mëdha materiale, askush në botë, veç bashkëpunëtorëve të nazifashistëve, nuk ka mohuar se në Shqipëri janë vrarë, plagosur e zënë robër mbi 70 mijë armiq pushtues italianë e gjermanë. 28 mijë janë dëshmorë të Atdheut të rënë në lulen e rinisë për çlirimin e vendit. A mund të mendohet se këta të rënë të lavdishëm s’paskan vrarë asnjë ushtar italian a gjerman? I pata kërkuar Adriatikut në një ballafaqim në TV që të thoshte qoftë edhe një brigadë të vetme ushtarake gjatë LANÇ-it me ballistë dhe emrin e komandantit të saj! Po nuk më dha përgjigje, veçse me tha që ballistë në luftë ka pasur më shumë se partizanë?! Alimadh, unë po të kujtoj se gjatë LANÇ-it 70 mijë partizanët e saj, prej të cilëve 6 mijë kanë qenë gra e të reja e 10 mijë pionierë, të gjithë të inkuadruar në 24 Brigada Sulmuese dhe këto në 8 Divizione Sulmuese e 3 Korparmata. Ka pasur edhe një Shtab të Përgjithshëm të UNÇSH! Ka pasur edhe një Komandant te Përgjithshëm, Enver Hoxhën! Më duket që Balli ka pasur vetëm disa çeta të organizuara për të mbrojtur pushtuesit! Për të mos “hëngër” hakun, diku është thënë se në ndonjë rast edhe çetat e Ballit kanë zbrazur “ndonjë batare” kundër italianëve! Sado i lajthitur të jetë një njeri, ai nuk mund të thotë banalitete si këto që po dëgjojmë prej ballistëve të rrjedhur!

Për të emocionuar njerëzit, Adriatiku është sforcuar të mbledhë edhe më shumë emra të vrarësh ballistë, emra fshatrash e zonash ku kanë “ndodhur” gjërat, pa menduar thellë se ato shifra e të dhëna janë lehtësisht të kuptueshme, të sajuara prej tij. Me kokën e tij bosh, Aliu nxjerr se gjatë LANÇ-it partizanët e komunistët “kriminelë” paskëshin vrarë 4 mijë deri në 6 mijë vëllezër shqiptarë e, për ta bërë tymnajën më të madhe, nuk flet për ballistë, po për vëllezër shqiptarë! Alimadhi e di mirë që po gënjen kur thotë 4 mijë deri 6 mijë vëllezër shqiptarë! Se edhe pula ballistësh të ishin gjithë kjo diferencë në inventarin e tyre (nga 4000 në 6000) do të kundërshtohej!

Po unë nuk po i futem shifrave, veç po them se për krimet që kanë kryer gjatë LANÇ-it e më pas, janë vrarë ballistë, zogistë e armiq të tjerë të Atdheut e të pushtetit popullor. Po ky, Alimadhi, nuk thotë se për ç’vepra “trimërie” ata janë dënuar, a janë vrarë pa gjyq në rrugë, në shtëpi e duke pirë raki me meze pule, apo si?! Nuk thotë se sa vetë prej atyre “vëllezërve shqiptarë” janë dënuar me vendime të gjykatave të popullit! Ali, ti e di se ata që kanë bërë e bëjnë krime i dënon çdo popull e shtet, veçse shteti socialist ka dënuar më pak, sepse ai kishte në plan të parë parandalimin e krimit! Alimadhi ka dashur, mbase, që PKSH e pushteti popullor t’i puthte kriminelët ballistë e të tjerë, që bënin krime e shkelnin ligjet e pushtetit popullor, t’i dekoronte kriminelët që vranë Heroinat e Mirditës, Babë Rexhën, Bardhok Bibën, Ndrec Ndue Gjokën, Heronjtë e Vigut, Heronjtë e Shkodrës, ata ballistë e të tjerë, që agjenturat e huaja i sillnin nga toka e ajri për të përmbysur pushtetin popullor të Enver Hoxhës, etj! Pse nuk thotë ky se ka “male” me dokumente në arkivat e Aleatëve të Mëdhenj e edhe të pushtuesve që Balli Kombëtar me të gjithë veprimtarinë e tij ndihmoi pushtuesit e huaj në luftën kundër LANÇ-it? Pse nuk thotë se në vjeshtën e vitit 1943 Balli doli hapur në shërbim të pushtuesve dhe u hodh në luftë me armë kundër LANÇ-it dhe se në këto rrethana PKSH nuk mund të mos i përgjigjej me luftë deri në shkatërrimin e tij të plotë së bashku me pushtuesit gjermanë, siç edhe veproi? Pse nuk thotë të vërtetën që Balli provokonte hapur ndezjen e luftës civile në Shqipëri dhe se ishte gjeniali Enver Hoxha, ai burrë i madh i kombit, që e parandaloi një luftë të tillë, vëllavrasëse, madje bëri diferencime të thella në radhët e ballistëve, për të goditur pastaj ata që e meritonin atë qëndrim?

Alimadhi, jo pa qëllim akuzon si kriminelë Enver Hoxhën e Mehmet Shehun, madje me një djallëzi prej ballisti i përmend përkrah njeri-tjetrit për shkak të asaj që ka ndodhur më 1981 me Mehmet Shehun! Aliu e di bukur se Enver Hoxha është burri më i madh i kombit dhe se ballistët e Balli, po të mos kishte qenë Enveri do ta kishin pësuar edhe më keq! Ishin mençuria, pjekuria politike e ideologjike e tij që, siç e thashë, bëri në radhët e ballistëve seleksionime e diferencime të domosdoshme, duke shpëtuar shumë bij e bija të popullit të gënjyer prej propagandës antikombëtare të Ballit! Alimadhi nuk ka këllqe të bëjë diversion në radhët e komunisteve me Mehmet Shehun, i cili, edhe për inat të ballistëve, mbetet një figurë historike e papërsëritshme e LANÇ-it.

*Sekretar i parë i PPSH