SHQIPËRI – DANIMARKË 1:1 (si gjithmonë na dridhen leqet në minutat e fundit)

Kanë qenë minuta ankthi ato në “Elbasan Arena”, ku kombëtarja shqiptare ka barazuar me Danimarkën në ndeshjen e dytë për kualifikueset për Euro 2016.

Edhe këtë radhë, Kombëtarja pësoi gol në minutat e fundit.

Ndërsa duheshin më pak se dhjetë minuta që të mbyllej takimi, lojtarët nuk arritën të mbajnë të paprekur portën.

Megjithatë minutat e fundit kanë qenë një lojë e hapur, ku të dy ekipet kanë pasur mundësi që të shënojnë.

Në tre minutat e shtesës, Danimarka ka qenë tepër e rrezikshme, por portieri Berisha nuk ka lejuar pësimin e golit.

Aktualisht, kombëtarja shqiptare ka 4 pikë dhe kryeson bashkë me Danimarkën grupin.

Danezët kanë mundur që të barazojnë në minutën e 81. Ka qenë një hutim i mbrojtësve të kombëtares shqiptare, që kanë toleruar edhe golin. Ka qenë numri 21 i danezëve, Lasse Vibe, që ka mposhtur Berishën.

Pas Golit, De Biasi ka futur në lojë Valdet Ramën në vend të Xhakës.

Në pjesën e dytë danezët u treguan më kërkues për golin.

Në minutën e 55, kombëtarja jonë do të vendosej në vështirësi kur portieri Berisha do të shikonte që topi do të parakalonte portën e tij dhe kapitenit Lorik Cana do ta largonte më pas topin me shpejtësi.

Edhe Shqipëria pati një rast të artë, por sulmuesi shkodran Bekim Bala dhe Andi Lila nuk do të arrinin që ta devijonin topin në portë.

Tekniku italian në minutën e 69 vendos që të zëvendësojë Bekim Balën me Çikalleshin për t’i dhënë më lëvizshmëri lojës.

Pjesa I

“Elbasan Arena” ka shpërthyer nga brohoritjet e tifozëve kur Ermir Lenjani  shënoi në minutën e 38 të takimit.

Pas një inkursioni personal nga mesfusha, Lenjani gjuan fuqishëm nga jashtë zone duke mposhtur portierin dhe kaluar kuqezinjtë në avantazh.

Lenjani do të mbahet mend edhe për golin e parë në stadiumin e ri.

Deri më tani Lenjani është lojtari më i mirë. Në krahun e majtë, ai është i papërmbajtshëm, duke detyruar kundërshtarët që t’i shkaktojnë faulle.

Ndërkohë kombëtarja po vuan më shumë  në krahun e djathtë, ku është Vila.

Në minutën e 3, Shqipëria pretendoi për një 11-metërsh pas rrëzimit në zonë të Lenjanit, por nuk ishte i këtij mendimi arbitri.

Për dhjetë minutat e tjera, Danimarka ka marrë në dorë frenat e ndeshjes, duke e detyruar ekipin tonë që të tërhiqet.

Gjithsesi, lojtarët tanë arrijnë që të mbrohen mjaft mirë, ndërsa tentojnë të shfrytëzojnë rastet për të dalë në kundërsulm.

Në minutën e 18 ka ardhur edhe kërcënimi i parë real për portën tonë. Numri 10 i danezëve, Eriksen, ndërmerr një aksion personal, por gabon në goditje pasi topi përfundon mbi traversë.