“Kjo histori nuk është mbyllur…”
Kështu shkruan sot gazeta franceze “L’Équipe” për mundësitë e Barcelonës për të transferuar mesfushorin Marco Verratti.
Ylli i PSG-së, i kërkuar me ngulm nga katalanasit, pak ditë më parë kërkoi zyrtarisht falje për deklaratat e agjentit të tij, Donato Di Campli, i cili klientin e tij e pati përshkruar si një “i burgosur i Emirit të Katarit”.
Ndjesa e italianit krijoi përshtypjen se ëndrra e Barcelonës dhe e vetë lojtarit për t’u bashkuar në “Camp Nou” u mbyll me aq, por jo.
Sipas së përditshmes prestigjioze, drejtuesit e PSG-së ende janë të vetëdijshëm për synimin e 25-vjeçarit dhe mund ta shesin për 70 deri në 100 milionë euro.
Pra, kjo do të thotë se rrjedha e ngjarjeve nuk ka ndryshuar në mënyrë dramatike. Verratti ende po mendon të largohet dhe Barcelona është destinacioni i tij ideal. Ndoshta këto ditë nuk do të ketë shumë lajme apo deklarata për këtë çështje, por deri në fund të gushtit padiskutim që duhet pritur çdo skenar.