Letër e hapur kryetarit të PD, cili është trafikanti në tryezën tuaj antidrogë, z. Basha?

Luli! Po “trokasim” për herë të dytë në ndërgjegjen tuaj, pas dje ju bëmë një thirrje publike, e cila ka marrë disa telefonata anonime në adresë të redaksisë, por ende jo një përgjigje serioze sic e meriton protesta antidrogë e së premtes. Pardje ju në një tryezë të rrumbullaktë (tamam-tamam ishte tryezë vezake në formën e boçeve të opiumit) kishit mbledhur një sërë figurash politike dhe jo vetëm për të shpallur atë që ju e quajtët Aleanca kundër Drogës.

Është për tu vlerësuar nisma juaj për luftë kundër drogës, ajo bazohet mbi parime fisnike, por një konsultë mund ta kishit bërë me deputetin Berisha përpara se t’i mblidhnit “aleatët kundër drogës”. Jua thamë dje, po ju japim dhe një mundësi të dytë sot që ti përgjigjeni qytetarëve meqë ata “janë të parët”. Një prej personave aty në tryezën tuaj, ka dosje trafikimi të drogave të rënda. Dosja ndodhet në SHISH, në Prokurori dhe në të paktën një ambasadë të huaj. Vetë zoti Berisha e ka akuzuar qartazi edhe pse pa i përmendur emrin disa vite më parë. Ishte koha kur Berisha donte të shpëtonte prokurorinë nga zgjedha e Theodhori Sollakut dhe për ta shndërruar në një institucion demokratik, prandaj i kujtoi këtij të fundit se tek pallati ngjitur me zyrën e tij si ish-kryeprokuror ‘ngriheshin sarajet e drogës dhe heroinës turke”. Ne ende sot e kësaj dite nuk e kemi mësuar pse Profesor.Doktor Sali Berisha, ky luftëtar i paepur që nuk kursen emrin e askujt kur vjen puna për luftën kundër drogës dhe padrejtësive, në rastin konkret, nuk e përmendte dot atë emër.

Jemi të sigurtë që edhe ju , njësoj si ne; mendoni se jo pa arsye Berisha nuk e përmendte dot emrin e drogmenit kur i kujtonte pallatin e drogës ish-kryeprokurorit Sollakut. Gjë të sigurt nuk dimë, por arsyet e këtij rezervimi nga ana e zotit Berisha, me siguri që lidhen me arsye madhore që kanë të bëjnë me të ardhmen euro-atlantike të vendit, për të cilën Berisha ka 2 dekada që punon ditë e natë pa pushim. Zoti Lul, ju keni qenë dhe ministër kur Berisha i bënte këto akuza. Duhej të ishit treguar më kurioz. Më pas u bëtë dhe ministër i Brendshëm, duhej ta kishit pyetur në imtësi doktor Berishën për emrin në fjalë. Këtë neglizhencë si ministër mund dhe t’ua mirëkuptojmë pasi keni i qenë i ngarkuar dhe nën trysninë e skenarëve ogurzeza me çadra pistoletë dhe thika me helm që u ndërmorën ndaj jush.

Por kurrsesi nuk mund t’iu kuptojmë neglizhencën e ditës së djeshme në atë tryezë. Si mundët ju zoti Lul, të mblidhnit atë tryezë pa e konsultuar listën e pjesëmarrësve me doktor Berishën? Por asnjëherë nuk është vonë, pyete sot dhe pasi ta pyesësh shiko dhe listën e personave që ke pasur në tryezën e Aleancës Kundër Drogës. Pasi t’i krahasosh emrat thirri mendjes dhe mos bëj më mbledhje me kokën tënde.