Rihetimi pas zhvarrosjes: I mituri lezhjan u vra nga oficeri i policisë

Prokuroria e Lezhës ka mbyllur një hetim të vështirë për ngjarjen e 17 korrikut 2010 te rrethrrotullimi i Kallmetit, kur në ndjekjen e një makine me disa të dyshuar si grabitës të shtetasve të huaj u vra një 16-vjeçar. Pas rihapjes së dosjes dhe zhvarrosjes së viktimës, u rindërtua skena e ngjarjes dhe provua se autor i vrasjes nga pakujdesia është ish-shefi i Antiterrorit të Lezhës, Skënder Seferi. Ngjarja nuk u hetua siç duhej në fillim, duke fshirë disa gjurmë, ndërsa rihetimi çoi dje për gjykim oficerin që akuzohet për vrasjen e të miturit Armando Skandaj.

Hetimet

Më datë 17 korrik 2010, rreth orës 16:00, është ngritur një postbllok nga Komisariati i Lezhës, pranë Urës së Cenit, me qellim ndalimin dhe kontrollin e një automjeti. Qëllimi ishte ndalimi i Ardit Skandaj dhe Flori Nikollit, të cilët ishin të dyshuar për kryerjen e “grabitjes me armë në bashkëpunim”, në dëm të shtetasve malazezë, Xhevat, Musa dhe Zoja Hidroviç, ngjarje e ndodhur me datë 15 korrik 2010, në aksin rrugor Lezhë-Shkodër, në kryqëzimin e fshatit Kallmet.

Në aksion morën pjesë edhe oficerë gjyqësorë dhe ish-shefi i Sektorit Kundër Akteve Terroriste, Skënder Seferi. Mjeti është ndjekur nga policia në superstradën Lezhë-Tiranë, ndërsa brenda ishte edhe i mituri Armando Skandaj, 16 vjeç. Te Ura e Cenit u ngrit postblloku tjetër me makinë dhe motor policie në të dy krahët.  Drejtuesi Ardit Skandaj kur ka parë postbllokun, është tërhequr pas, por aty ka ndërhyrë mjeti që e ndiqte. Dyert ishin të mbyllura dhe nuk hapeshin. Ka lëvizur përsëri duke goditur makinën dhe motorin e policisë, por edhe duke dëmtuar disa policë në aksion.

Duke parë veprimet e Skandajt është qëlluar me armë në drejtim të gomave. Por ka patur edhe një të shtënë automatiku që ka shpuar xhamin e pasmë të veturës. Mjeti me dy të rinjtë megjithatë ka mundur të largohet dhe u gjet më pas i braktisur në Balldre. Brenda tij ishte trupi i pajetë i 16-vjeçarit Armando Skandaj. Nga veprimet rezultoi se në makinë ishin Ardit Skandaj, Flori Nikolli, Sokol Jashari dhe Fatjon Sefullai, që akuzohen edhe për grabitjen e malazezëve.

Nuk ishte qëlluar nga brenda-jashtë mjetit dhe vrasja e të miturit është kryer nga një prej policëve në aksion – është përfundimi i hetuesve. Nga ekspertiza u provua se predha ishte qitur nga automatiku i Skënder Seferit. Por sipas dëshmive, vrasja është kryer nga pakujdesia – thuhet në raportin hetimor.

Ardit Skandaj, vëllai i viktimës, u kap në një tjetër operacion, ku dëshmoi se vëllanë ia vrau policia. Ai është ende në gjykim për grabitjen e shtetasve malazezë.