Ushtria libaneze deklaroi sot se ka nisur një ofensivë kundër grupit esktremist të Shtetit Islamik në një enklavë afër kufirit verilindor të Libanit me Sirinë. Një ndërhyrje ushtarake nga ana e Libanit pritej prej kohësh.
“Në emër të Libanit, në emër të ushtarëve libanezë të rrëmbyer, në emër të dëshmorëve të ushtrisë, unë njoftoj se operacioni ka filluar,” tha shefi i ushtrisë, gjenerali Joseph Aoun.
Njëherësh, grupi shiit në Liban, Hezbollah, ka shpallur se së bashku me ushtrinë siriane, e ka filluar një operacion në pjesën perëndimore të malit Kalamoun.
Ushtria libaneze po synon pozicionet e Shtetit Islamik të Irakut dhe grupit levant ISIL, i njohur si ISIS, pranë qytetit Ras Baalbek, me raketa, artileri dhe helikopterë, tha një burim libanez i sigurisë.
Në një konferencë për shtyp, zëdhënësi i ushtrisë libaneze, gjeneral brigade Ali Kanso, tha se ofensiva nuk filloi sot.
“Ne kemi planifikuar sulmet për më shumë se dy javë,” tha Kanso, duke folur nga selia e ministrisë së mbrojtjes.
Ai shtoi se operacioni do të vazhdojë derisa ushtria të ripërtërijë kontrollin e pjesës së fundit të kufirit libanezo-sirian, që mbetet nën kontroll të grupit ekstremist, Shteti Islamik.
Çfarëdo operacioni i përbashkët i ushtrisë libaneze me Hezbollahun dhe me ushtrinë siriane,do të jetë i ndjeshëm politikisht në Liban, pasi Libani merr ndihmë të konsiderueshme nga ushtria e Shteteve të Bashkuara, ndërsa Uashingtoni e klasifikon Hezbollahun e mbështetur nga Irani, si grup terrorist.