Kuvendi i Shqipërisë, në seancën e sotme shqyrton projektligjin “Për Agjencinë e Inteligjencës së Mbrojtjes” dhe disa ndryshime në ligjin “Për përgjimin e komunikimeve”. Dy draftet e mësipërme, të propozuara nga maxhoranca, janë kundërshtuar nga opozita, e cila nuk i ka votuar as në komisionet parlamentare.
Gjatë fjalës së tij, deputeti socialist, Taulant Balla, u shpreh me një ligj të tillë, Shqipëria bëhet pjesë e skenarit të keqpërdorimit të institucioneve të inteligjencës. Ai theksoi se opozita do të votojë kundër, pasi ligji për Shërbimin Informativ Ushtarak nuk mund të ndryshojë pa u hetuar fillimisht ky institucion.
“Nuk mund të mohohet me ligj kontrolli mbi SHISH-in. Ky institucion më 19 janar 2011, me urdhër të Arben Imamit është armatosur. Ky institucion me urdhër të Sali Berishës është keqpërdoruar duke përgjuar opozitën. Janë blerë aparatura përgjimi, të cilat edhe sot përgjojnë opozitën dhe ambasadorët e huaj. Si mund të tentoni që me një ligj të tillë, me një përpjekje të Arben Imamit të bëhemi pjesë e një skenari të rrezikshëm të keqpërdorimit të institucioneve të inteligjencës. SHISH-i duhet hetuar para se të ndryshojë ligji. Ne kemi kërkuar prej muajsh dhe Komisioni i Sigurisë ka dhënë pëlqimin për një komision hetimor, por maxhoranca e ka refuzuar”, tha Balla.