Lirohet Yulia Tymoshenko

Liderja e opozitës në Ukrainë, dhe ish-kryeministrja Yulia Tymoshenko, është liruar nga burgu, njofton korrespodenti i Radios Evropa e Lirë në Kharkiv.

Tymoshenko është mbajtur në burg për katër vjet, për shkak të dyshimeve për keqpërdorim të pozitës zyrtare.

Pas lirimit nga spitali, ku po mbahej nën masa të rrepta të sigurisë, Tymoshenko është përshëndetur nga qindra simpatizantë të saj, përderisa po largohej me makinë.

Mbështetësit e saj brohorisnin “Free Yulia”, e cila njihet si kundërshtarja më e madhe e presidentit Viktor Yanukovych, i cili është larguar sot nga kryeqyteti Kiev, pas skenave dramatike të cilat ia përmbysën pushtetin.

Më herët gjatë ditës, deputetët zgjodhën Arsen Avakov, si ministër të Punëve të Brendshme dhe Oleksandr Turchunov si kryetar të Parlamentit të Ukrainës.

Të dy janë aleatë të Tymoshenkos.

Parlamenti, po ashtu, ka miratuar një mocion të votëbesimit, me të cilin shkarkohet prokurori i përgjithshëm Vikto Pshonka.

Lideri i opozitës Oleh Tyahnybok, që drejton partinë politike Svoboda, i tha ligjvënësve të shtunën se është esenciale që të ruhet integriteti territorial i Ukrainës.

“Nuk kemi asnjë të drejtë që ta lejojmë shtetin tonë të ndahet. Të gjithë ne këtu jemi burrështetas, dhe duhet ta kuptojmë se atje ka njerëz që janë të interesuar ta shpërbëjnë Ukrainën. Detyra jonë është që ta ruajmë tërësinë territoriale të Ukrainës”, ka thënë ai.

Ndërkohë, zyrtarët e Partisë së Rajonit, e cila më nuk është në pushtet, janë mbledhur në qytetin lindor Kharkiv.

Sipas një zëdhënësi të presidentit, Viktor Yanukovych është duke marrë pjesë në këtë konferencë në Kharkiv, mirëpo këto pohime nuk janë konfirmuar ende.

Deputeti i Dumas ruse, Aleksei Pushkov, që udhëheq Komitetin për Punë të Jashtme, është duke kryesuar delegacionin rus në konferencën që po zhvillohet në Kharkiv, në të cilën po marrin pjesë edhe guvernatorët e katër rajoneve fqinje, të banuara me shumicë ruse.

“Në kongresin në Kharkiv”, ka shkruar Pushkov në Twitter, “nuk ka asnjë gram të seperatizmit. Temat kryesore të fjalimeve janë: ‘Nuk jemi duke u bërë gati për të shpërbërë shtetin, por ta ruajmë’”.

Megjithatë, delegatët pjesëmarrës në këtë konferencë, kanë shfaqur dyshime për legjitimitetin e masave të miratuara nga Parlamenti në Kiev.

Ministria e Punëve të Brendshme të Ukrainës ka postuar një komunikatë në portalin e saj ku thotë se “jemi plotësisht me popullin e Ukrainës”. Kjo ministri po ashtu ka bërë thirrje që “të bashkohen përpjekjet për rikthimin e sigurisë publike”.

Protestuesit, anti-qeveritar në Kiev, kanë marr nën kontroll zyrat administrative të presidentit ukrainas.

Ministri i Punëve të Jashtme të Gjermanisë, Frank-Walter Steinmeier i ka bërë thirrje qeverisë së opozitës së Ukrainës që të respektojnë marrëveshjen paqësore në të cilën vunë firmat e tyre, një ditë më herët.

“Tani gjithçka varet nga të dyja palët në konflikt-qeveria dhe opozita-që t’i përmbahen asaj për të cilën janë pajtuar, dhe të fillojnë të ndërtojnë një marrëdhënie mirëbesimi”, ka thënë shefi i diplomacisë gjermane, në kohën kur presidenti Viktor Yanukovych duket se i është kolapsit pas muajve të tërë protestash.

“Hapi i radhës është që të arrihet brenda 10 ditëve, një qeverie e re, siç është e përshkruar në marrëveshje. Nëntë ditët e mbetura duhet të shfrytëzohet për të arritur këtë qëllim. Kjo është një prej pika kyçe të marrëveshjes, dhe qeveria si dhe opozita, duhet ta dinë se duhet të arrijnë këtë pikë. Sepse përndryshe, ka rrezik për destabilitet”, ka thënë Steinmeier.

Marrëveshja e arritur të premten, me ndërmjetësimin e perëndimit, bënë thirrje për zgjedhje të hershme, dhe formimin e një qeverie të unitetit, ndërsa i ofron amnisti të gjithë protestuesve anti-qeveritar që janë arrestuar gjatë tri ditëve të kaosit në Kiev.

Mbi 70 persona kanë humbur jetën në këto trazira.(f.aliu) /REL/