Listat e kryetarëve, voluntarizëm tribal

Kryetarët kanë marrë letër dhe laps dhe kanë vizatuar parlamentin e ardhshëm sipas qejfit dhe dëshirë së tyre personale. Një voluntarizëm tribal, më shumë sesa një ushtrim demokratik – thote Skender Minxhozi ne kete interviste ne Forumin e DITA.

Skender, si do t’i vlerësoni listat e kandidatëve të PD-së dhe PS-së?

Janë lista që përfaqësojnë situatën e brendshme të këtyre forcave politike, grupimet dhe interesat që vihen në lëvizje prej këtyre grupimeve, si dhe lojën taktike të dy partive, në funksion të 23 qershorit. Mendoj se lista e PD-së përbën një tentativë të qartë të Berishës për të minimizuar efektin e pritshëm negativ që do të ketë konsumimi i gjatë në qeverisje. Ky rreshtim emrash duket gjithashtu si një pranim i heshtur, nga ana e kryeministrit, e mundësisë konkrete të daljes në opozitë të PD. Futja e kryetarëve të partive aleate në listën e PD, do t’i japë formalisht kësaj partie, një numër më të madh votash, por do të ketë pasoja negative për koalicionin e djathtë.

Kurse lista e PS duket e përpiluar në funksion të rritjes së kontrollit të kryetarit Rama mbi partinë. Ajo gjithashtu duket e ndërtuar në një mënyrë të tillë që të respektojë indirekt rolin dhe peshën e LSI. Duket qartë se ka pasur një negociatë të detajuar të dy partive në këtë drejtim. Mosprania e emrave të partive të tjera në listën e PS (përjashtuar rastin e Spartak Brahos), shënon një pikë force për koalicionin e majtë.

PD ka hequr thuajse gjysmën e deputetëve të legjislaturës së fundit, ndërsa PS një të tretën. Është i natyrshëm një ndryshim i tillë apo kryetarët kanë larguar zërat kundër nga e drejta e rikandidimit?

Siç u shpreha më lart, bazuar edhe në sistemin zgjedhor me të cilin do të votohet, roli i kryetarëve të partive rezulton edhe njëherë i fortë dhe i paapelueshëm. Duket qartë se listat janë kthyer në një pronë thuajse private të krerëve partiakë, duke ju dhënë atyre një pushtet të paprecedent mbi procesin elektoral, por edhe mbi vetë formacionet politike që drejtojnë. Mendoj se kjo është një situatë dëshpëruese dhe e shëmtuar, nga pikëpamja e respektimit të demokracisë së brendshme. Asnjë konsultim paraprak i kandidaturave brenda partisë, asnjë forum i përfshirë në një vendimmarrje kaq delikate si ajo e hartimit të listës së kandidatëve për në parlament, asnjë respekt për institucionet dhe drejtuesit e partive. Kryetarët kanë marrë letër dhe laps dhe kanë vizatuar parlamentin e ardhshëm sipas qejfit dhe dëshirë së tyre personale. Një voluntarizëm tribal, më shumë sesa një ushtrim demokratik.

Tani që listat janë zyrtare, ku mendoni se kanë gabuar apo kanë vepruar drejt dy liderët? 

Listat janë kaq të gjata, saqë me to mund të merresh shumë gjatë. Të dyja partitë kanë bërë gabime, por edhe zgjedhje pozitive. 23 qershori do të tregojë cili ka gabuar më pak.