Llalla policisë e prokurorëve: Mos nxirrni sekrete, procedim penal

Në 10-vjetorin e ngritjes së Prokurorisë së Krimeve të Rënda, kryeprokurori Adriatik Llalla lëshon akuza të rënda për nxjerrje të sekretit hetimor ndaj Policisë dhe vartësve të tij. Fjala e mbajtur gjatë analizës vjetore në këtë institucion ditën e djeshme, ishte një “dush i ftohtë” që më së shumti shfryn superoperacionin policor për goditjen e bandës së tritolit dhe bandës së grabitësve. Llalla dënoi mënyrën e nxjerrjes së informacioneve nga policia për rastin Julian Sinanaj dhe për pamjet filmike të karburantit të grabitur. Por nuk harroi të t’i tërhiqte veshin edhe njerëzve të prokurorisë me hetimet që ndjekin dhe informacionet që nxjerrin, duke paralajmëruar ndjekje penale për këdo. I pranishëm në analizë, edhe kreu i Krimeve të Rënda Eugen Beçi. Vetëm fjala e Llallës ka qenë me dyer të hapura dhe më tej gjithçka është zhvilluar me dyer të mbyllura.

Kritikat e Llallës

“Jemi përballur kohët e fundit me publikimin e elementëve, të cilat përbëjnë prova të rëndësishme material për proceset hetimore. Nxjerrja e këtyre të dhënave, natyrisht godet rëndë cilësinë e hetimit dhe vijimin e tij. Për këtë arsye, kërkoj nga të gjithë ju që t’i kushtoni vëmendje të veçantë kësaj kërkese proceduriale. Kjo është një praktikë antiligjore, e cila duhet të marrë fund. Në çdo rast që do të konstatohet nxjerrje informacioni, do të nisë menjëherë procedimi penal”, tha Llalla në fjalën e tij. Dhe këtë e argumentoi më poshtë, duke lënë të kuptohej se e kishte fjalën për rastin Sinanaj dhe grabitjet e karburanteve. “Organi i prokurorisë duhet të jetë garant për respektimin e ligjit. Duhet t’i kushtohet një rëndësi e veçantë rritjes së shpejtësisë dhe efikasitetit të hetimeve. Në analizë të veprimtarisë së vitit 2013, konstatohet se kjo është një çështje, e cila ka nevojë për përmirësim. Po ashtu, duhet rritur numri i hetimeve proaktive, pasi vlerësohen si një ndër mënyrat më të suksesshme për të luftuar krimin e organizuar dhe trafiqet”, tha ai.

Analiza dhe këshillat

Prokurori i Përgjithshëm, gjithashtu ka kërkuar nga Krimet e Rënda, që pavarësisht volumit të lartë të punës t’i kushtojnë më shumë vëmendje hetimit pasuror dhe Ligjit Antimafia. “Sfidë në 2013 kanë qenë veprat penale kundër funksionarëve të policisë, krimi në familje, krimi i organizuar. Sekuestrimi dhe konfiskimi i pasurive të krijuara nga veprat penale dëmton rëndë strukturat kriminale. Zbatimi më efikas i ligjit Anti-Mafia sjell sukses në luftën kundër krimit të organizuar. Po ashtu, duhet të vijojë të jetë në nivele të larta bashkëpunimi ndërkombëtar në drejtim të hetimit të aseteve kriminale, kryesisht me Policinë e Shtetit dhe Drejtorinë e Parandalimit të Pastrimit të Parave. Hetimi për trafikun e qenieve njerëzore, sidomos të grave dhe të miturve do të shihet në një optikë të re Shumë nga viktimat e trafikimit, të gjendur në trysninë e autorëve të veprave penale, kanë vështirësi në bashkëpunimin me autoritetet”, tha Llalla. Gjithashtu Llalla theksoi se në kuadër të përmirësimit të hetimeve, do të synohet forcimi i kapaciteteve njerëzore dhe logjistike të Prokurorisë së Krimeve të Rënda. Kreu i organit premtoi trajnime e specializime të tjera për prokurorët dhe zgjidhje për volumin e çështjeve.