SHËNIM: Loja me “dorëheqjen”, Blushi emërohet drejtor i TCH 

Ben Blushi do të jetë Drejtori i Përgjithshëm i Top Channel.

Lajmin e ka dhënë presidentja e kompanisë, Vjollca Hoxha.

“Kam kënaqësinë të njoftoj të gjithë shikuesit dhe punonjësit e Top Channel se duke filluar nga sot z.Ben Blushi do të jetë Drejtor i Përgjithshëm i Top Channel. Si një gazetar, shkrimtar dhe politikan që ka vendosur pavarësinë dhe të vërtetën mbi çdo interes, jam e bindur se z.Blushi do të ndihmojë Top Channel për të hapur një cikël të ri komunikimi dhe informimi me të gjithë dashamirësit tanë në krejt hapësirën shqipfolëse. Dua t’i siguroj të gjithë se Top Channel i mbetet besnik parimeve tona si një media e lirë, e pavarur dhe profesionale, e cila ka qenë, është dhe do të jetë përherë në shërbim të së vërtetës dhe lirisë së informimit”, thotë Hoxha.

Kjo është dhe arsyeja e deklarimit të Blushit se heq dorë nga partia Libra.

Burime nga TCH thanë për Dita se, ndryshe nga sa ua ka paraqitur bashkëpunëtorëve të tij në parti, Blushi e ka marrë vendimin për TCH përpara se të largohej nga Libra.

Kjo tregon sa pak besim ka patur ai tek lëvizja politike që vetë e ngriti.

Me “dorëheqjen” ai vrau dy zogj, duke patur parasysh përjashtimin e Mimoza Hafizit.

Me mbetjen jashtë parlamentit në zgjedhjet e fundit, Blushi deklaroi largimin nga politika duke kritikuar popullin që nuk kupton.

Mbetet për t’u parë nëse Blushi do ketë sukses me këtë projekt mediatik, apo do lodhet shpejt dhe do ta braktisi atë si projektet politike përfshirë Libra, LMN etj.

Ndërkohë kanali TCH do kuptojë nëse i mungojnë Emrat apo Puna, pra nëse zgjidhjes së krizës atje i duhen “drejtorë të famshëm” apo “punëtorë – anonimë”.

Këta të fundit kanë muaj që arratisen një e nga një nga një kanal gjithmonë e më i paqartë në politikat editoriale.

b.m. / dita