Më shumë se 800 familje në zonën e Vilave Zvicerane në Londrën veri-perëndimore janë evakuuar për shkak të shqetësimeve të sigurisë ndaj zjarrit.
Këshilli i Camden u shpreh se banorët u zhvendosën për t’i hapur rrugë punimeve emergjente të sigurisë ndaj zjarreve. Këshilli gjithashtu shtoi se për këta persona po prenotohen hotele por rreth 100 banorë e kanë kaluar natën në shtretër me ajër të vendosur në një qendër për kohën e lirë.
Veshja e jashtme e ndërtesave në këtë bllok banimi ka rezultuar të jetë e ngjashme me atë të Kullës Grenfell në Londrën perëndimore, ku zjarri i disa ditëve më parë mendohet të ketë vrarë 79 persona.
Edhe ndërtesat në zonën e Vilave Zvicerane janë rinovuar nga e njëjta firmë që mbikëqyri punimet në Kullën Grenfell.
Sipas Këshillit të Camden, veshja e jashtme termale në 5 kullat e banimit të zonës do të hiqet, ndërkohë që ekzistojnë shqetësime edhe për izolimin e tubave të gazit që shkojnë në apartamente si dhe për dyert rezistente ndaj zjarrit.
Vendimi për evakuimin erdhi pasi shërbimet zjarrfikëse raportuan në Këshillin e Camden se nuk mund të garantohej siguria e banorëve në këtë bllok.
Punimet për sigurimin e zonës do të kërkojnë disa javë për t’u përfunduar, ndërkohë që qeveria është zotuar të ofrojë gjithë mbështetjen e duhur për banorët dhe zyrtarët që po punojnë në këtë bllok.