Lotaria amerikane, nis sot shpallja e fituesve

Dita e sotme shënon edhe hapjen zyrtare të procedurës për njoftimin e aplikuesve të përzgjedhur në fazën e parë. Verifikimi kryhet në adresën http://www.dvlottery.state.gov duke kontrolluar statusin e konkurruesit. Në këtë faqe mund të hyni vetëm nëse keni të ruajtur kodin unik të  aplikimit. Procedura e plotë deri në marrjen e vizës së  emigrimit për në SHBA

Pranvera Kola

Sot nis zyrtarisht konfirmimi i aplikimeve që janë pranuar në fazën e parë të programit të lotarisë amerikane për 2014-n. Sipas burimeve zyrtare të Ambasadës Amerikane, kandidatët e regjistruar në këtë program duke filluar nga sot duhet t’i drejtohen faqes zyrtare të internetit për të mësuar nëse aplikimi i tyre është përzgjedhur ose jo.

“Për ata që kanë aplikuar për lotarinë 2014, njoftimi zyrtar i përzgjedhjes do të kryhet drejtpërdrejt nëpërmjet Kontrollit të Statusit të Aplikimit (Entry Status Check), i cili do të jetë në përdorim duke filluar nga data 1 Maj 2013, në faqen e Internetit të Departamentit Amerikan të Shtetit, Byrosë së  Çështjeve Konsullore “Aplikimi Elektronik për Vizat e Shumëllojshmërisë”, thuhet nga burimet zyrtare të Ambasadës Amerikane në Tiranë.

Lajmërimi i fituesve

Ky verifikim do të kryhet nëpërmjet “Kontrollimit të Statusit të Konkurruesit (Entry Status Check) në adresën zyrtare të internetit të programit të Lotarisë Amerikanehttp://www.dvlottery.state.gov/.  Kontrolli i statusit të aplikimit do të jetë mjeti i vetëm me të cilin fituesit apo të përzgjedhurit do të njoftohen që janë selektuar për programin e vizave të lotarisë amerikane DV-2014”, konfirmohet nga burimet zyrtare të Ambasadës Amerikane.

Kjo është e vetmja metodë me të cilën do të bëhet lajmërimi i fituesve për të vijuar procedurat e mëtejshme të aplikimit deri në marrjen e vizës së emigrimit. Një gjë e tillë do të thotë se nuk do të ketë më lajmërime nëpërmjet postës elektronike individuale. Njëkohësisht kontrollimi i statusit të aplikimit do t’ju ofrojë të përzgjedhurve udhëzime se si të vazhdoni me aplikimin duke diktuar informacionet për datën dhe orën e takimit për vizën e emigrimit.

Në këto kushte të përzgjedhurit e rastësishëm nga sistemi kompjuterik nuk do të njoftohen me anë të postës elektronike (e-mail). Procedurat e mësipërme janë shpjeguar në udhëzimet e Lotarisë DV-2014,  seksioni “Përzgjedhja e Aplikantëve”, në të cilat detajohen të plota afatet në lidhje me datat se deri kur do të vijojë shpallja e fituesve.

Procedura deri në marrjen e vizës

Nëse ju jeni përzgjedhur për të vazhduar më tej me procesin e Lotarisë, pasi të merrni udhëzimet, ju duhet të tregoni që jeni i ligjshëm për një vizë  emigrimi, duke përfunduar me sukses hapat e ardhshëm.  Kur kërkohet të bëni këtë nga Qendra Konsullore në Kentaki, do t’ju duhet të plotësoni aplikimin për vizë emigrimi, paraqisni dokumentet e kërkuara dhe formularët, të paguani tarifat e nevojshme, të përfundoni ekzaminimin mjekësor, dhe të intervistoheni nga një zyrtar konsullor në Ambasadën ose Konsullatën Amerikane për të demonstruar se ju kualifikoheni për një  vizë emigrimi diversiteti.

Kodi unik për verifikimin e aplikimit

Të gjithë të regjistruarit në programin e lotarisë fillimisht duhet të kenë  të ruajtur faqen e konfirmimit me kodin unik të përcaktuar që në fazat e aplikimit të zhvilluara në mbyllje të vitit të shkuar. Vetëm në këtë formë  do të mund të vijohet më tej për të parë  se çfarë ka ndodhur me aplikimin e bërë. Kjo pasi numri juaj i konfirmimit bën të mundur që të futeni në  faqen e internetit të lotarisë për të marrë  njoftimin nëse regjistrimi juaj është përzgjedhur nëpërmjet Kontrollimit të Statusit të Regjistrimit “Entry Status Check” që do t’ju vihet në dispozicion nga data 1 Maj 2013 në adresën http://www.dvlottery.state.gov. Të përzgjedhurit do të drejtohen në një faqe konfirmimi ku dhe do t’u jepen udhëzime të mëtejshme, përfshirë dhe informacione për pagesat lidhur me emigracionin në Shtetet e Bashkuara. Kontrollimi i Statusit të Regjistrimit do të jetë e vetmja mënyrë me të cilën të përzgjedhurit do të njoftohen.

Ata individë që nuk janë  përzgjedhur do të njoftohen vetëm duke parë statusin e tyre në Internet tek “Entry Status Check”.  Edhe për fazat e mëtejeshme “Kontrollimi i Statusit të Regjistrimit do të jetë mjeti i vetëm i informacionit për përzgjedhjen tuaj për DV-2014, duke ju dhënë udhëzime mbi vazhdimin e procesit të aplikimit, dhe duke ju njoftuar për datën dhe kohën e takimit tuaj në Ambasadë për vizë emigrimi.

“ Mbani mend, vetëm aplikantët e përzgjedhur njoftohen nga Departamenti i Shtetit, Qendra Konsullore në Kentaki (QKK). Asnjë organizatë tjetër apo kompani private nuk është e autorizuar nga Departamenti i Shtetit për të njoftuar aplikatët e DV-së për përzgjedhjen e aplikimit të tyre si fitues apo të hapave të mëtejshëm në procesimin e aplikimit për vizë”, thuhet nga Ambasada Amerikane.

Kujdes nga mashtrimi!

Nëse ju keni marrë një postë  elektronike (e-mail) që ju njofton se aplikimi juaj për programin e Lotarisë Amerikane ishte fitues dhe në mënyrë që  të vazhdoni me aplikimin tuaj ju duhet të dërgoni një  shumë të hollash (para) në emër të një  personi, ju jeni viktimë e një mashtrimi. Vitet e shkuara aplikantët fitues njoftoheshin nga Departamenti i Shtetit, Qendra Konsullore në Kentucky (QKK) me anë të postës, jo me e-mail dhe të përzgjedhurve u jepeshin udhëzimet se si të vazhdonin në hapat e mëtejshëm të procesit.

QKK-ja nuk ju kërkon juve t’u dërgoni para, po ashtu as ambasadës amerikane apo ndonjë ambasade tjetër të Shteteve të Bashkuara të Amerikës (me postë apo nëpërmjet shërbimeve si Western Union). “Vetëm pasi ju të jeni përzgjedhur, pasi t’u jeni përgjigjur udhëzimeve të njoftimit të mundësuar për ju nëpërmjet Kontrollit të Statusit të Aplikimit, si dhe pasi të ketë filluar procesimi i rastit tuaj, vetëm atëherë ju mund të merrni në vazhdim e-maile komunikimi nga QKK-ja që ju njofton juve të shikoni Kontrollin e Statusit të Aplikimit për informacione të reja rreth aplikimit tuaj”.

Deri në mbyllje të kësaj procedure në asnjë rast nuk nevojitet derdhja e parave për të  mësuar nëse jeni përzgjedhur ose jo. “Nëse ju merrni një e-mail që ju duket të jetë një njoftim mashtrimi me Llotarinë DV, ne ju kërkojmë që ju ta dërgoni atë e-mail në adresën tonë të postës elektronike [email protected]

Kjo pasi disa adresa interneti mund të  tentojnë t’ju çorientojnë duke ju bërë të  mendoni që ato janë adresat zyrtare të internetit për Lotarinë e Vizave të Shumëllojshmërisë. Ato mund të tentojnë t’ju kërkojnë të paguani për shërbime si formulari dhe informacionet, të cilat janë  falas në adresat e internetit të Departamentit të  Shtetit dhe të Ambasadave”, thuhet më tej nga  Ambasada.