LSI thërret konventën të dielën mbi situatën politike

Mbledhja e Kryesisë së LSI- së ka përfunduar dhe është vendosur që ditën e dielë në orën 10:00 të thërritet Konventa Kombëtare e kësaj force politike.

Kryetarja e LSI-së, Monika Kryemadhi është shprehur se vendi ndodhet në një situatë të rëndë ekonomike dhe për këtë gjë ka akuzuar qeverinë të cilën e ka cilësuar si të lidhur me krimin.

“E kemi deklaruar këtë edhe më parë dhe kemi pasur shumë të drejtë. Është lidhja mes Ramës dhe krimit të organizuar që frikëson investitorët e huaj, është lidhja mes Ramës dhe krimit të organizuar që po mbyt rritjen ekonomike, e cila është e vetmja arsye pse nuk ka vende pune”, tha Kryemadhi e cila ka shtuar se edhe imazhi i vendit në arenën ndërkombëtare është prishur.

Ajo ka bërë shkaktar kreun e qeverisë  për situatën në vend, duke  e akuzuar se është ai që shpërblen vetëm ata kategori njerëzish që kanë lidhje të ngushta me qeverinë.

Mbledhja e Konventës Kombëtare e LSI-së e cila do të mblidhet ditën e dielë do të vendosë për aksionin politik që kjo forcë do të  ketë.