Luan Rama: Kryeministrin e përcakton vota popullore

Sekretari i Përgjithshëm i LSI-së, Luan Rama, shprehet se koalicioni me Partinë Socialiste është funksional dhe garant i një fitoreje spektakolare në 23 qershor. Në një intervistë për GSH, Rama thotë se përfshirja e LSI-së në koalicion i ka dhënë të majtës garancinë e munguar për fitoren.

“Duke qenë produkt i një marrëveshjeje parimore, në themel të së cilës qëndron jo thjesht dhe vetëm interesi dhe aspirata e qytetarëve dhe natyrisht, edhe e të majtës shqiptare për të qeverisur vendin, por domosdoshmëria e ndryshimit të pashmangshëm dhe e rrotacionit jetik për fatet e Shqipërisë europiane, e cila më 23 qershor do të ndahet përfundimisht nga qeverisja e papërgjegjshme dhe abuzive, koalicioni LSI–PS është funksional, efektiv dhe garant i një fitoreje spektakolare në zgjedhjet e 23 qershorit. Frymës së fitores së të majtës që dominon tërë mjedisin politik, elektoral dhe qytetar në vend, përfshirja e LSI-së në koalicion i dha dimensione shumë më të gjera dhe një rezonance gjithëpërfshirëse, i dha garancinë e munguar dhe krijoi bindjen se 23 qershori përmes votës popullore dhe plebishitare do të realizojë ndryshimin e madh; lar-gimin e PD-së nga qeverisja e vend”.

Ndërsa në lidhje me çështjen e kryeministrit, Rama shprehet se do të jetë vota popullore ajo që do ta përcaktojë. “Këtë e vendos vota popullore e shqiptarëve më 23 qershor”. Sipas sekretarit të Përgjithshëm të LSI-së, “projekti i koalicionit LSI – PS dhe i shumë partive të tjera është shumë më i gjerë, shumë më ambicioz e shumë më i rëndësishëm se sa emri i një kryeministri”, tha Rama.