Luftë tifozësh, përfshihet Braçe

Të shtunën mbrëma, gjatë ndeshjes Tirana-Partizani, ajo që ra më shumë në sy ishin tifozët e ekipit të Tiranës, të cilët ishin angazhuar e kishin bërë shpenzime për të shkruar në banderola thirrje raciste të tipit ku thoshin se do të hapnin Aushvicin për tifozët e Partizanit (aty ku u ekzekutuan 1.2 milion njerëz). 

Kujtojmë se Shqipëria ka më shumë se 70 vjet që i paraqet botës dhe mbarë opinionit një vlerë, e cila lidhet me mbrojtjen që u kemi bërë hebrenjve të ardhur gjatë Luftës së Dytë Botërore. Por u desh një ndeshje futbolli që dhe ky mit i trumbetuar me të madhe të rrëzohej.

Te disa nga këto parulla u fokusua edhe deputeti i mazhorancës, Erion Braçe, i cili atë mbrëmje e ka parë ndeshjen nga stadiumi. Ai, nëpërmjet një statusi në Facebook, ka kërkuar një reagim të FSHF-së dhe Armand Dukës. “Po pres Presidentin e Federatës Shqiptare të Futbollit të dalë e të mbajë qëndrim në emër të institucionit që përfaqëson. Ishte dy karrige larg meje dhe pa gjithçka pashë dhe unë. Ai dhe Federata që drejton po heshtin kur duhet të reagojnë, madje të ndëshkojnë”, shkruan Braçe.

Ai më tej kërkon reagim edhe nga drejtuesit e ekipit të Tiranës. “Pres gjithashtu që të njohurit dhe miqtë e mi të Tiranës të flasin e distancohen, prej Halilit, Vorpsit, Nallbanit, Tafajt. Duhet ta bëni! Fashizmi na turpëron si komb!’, shkruan Braçe. Politikan që e përzien futbollin me politikën nuk ishte vetëm Braçe. Deputetja Ledi Shamku shkroi një status në Facebook, ku kujtonte kohën që Partizani favorizohej për shkak të politikës. Ajo shkruan: As ne kohen e Petrit Dumes nuk i janë dhonë Tironës 10 kartonë të verdhe dhe 1 të kuq! As në kohën e Petrit Dumes!.

Fyerjet dhe sharjet

Në Facebook, tifozët e Tiranës kanë disa faqe ku komentojnë mbi lajmet e skuadrës së tyre të zemrës. Ndër me aktivet janë “K.F Tirona” dhe “Tirona Fanatics”.  Ishin të shumtë ata që e quajtën Turp sjelljen dhe parullat e këtyre të fundit gjatë ndeshjes të së shtunës. Pas reagimeve në drejtim të tyre,  “Tirona Fanatics” thanë se “u provokuan nga tifozët e Partizanit me parullën : “Të vrasësh një tifoz të Tiranës nuk është krim”. Ata thanë edhe se Braçe nuk e ka pasur vërtet hallin te thirrja e Aushvicit, por te parulla në pëlhurë që tregonte rënien e monumentit të Enver Hoxhës me fjalët “marrëzia mori fund në vitin 1991”.  Kjo e fundit ishte një tjetër parullë, e cila zinte edhe sipërfaqen më të madhe. Në fakt do të ishte ideale që politika të lihej jashtë stadiumi, sepse ka qenë ajo që e ka çuar në këtë gjendje futbollin shqiptar.

Është fakt historik që Partizani dhe Dinamo në kohën e komunizmit kanë pasur një lloj favorizimi për shkak se njëra përfaqësonte Ministrinë e Mbrojtjes dhe tjera atë të Brendshme. Por ama po ashtu është fakt që futbollistët e Partizanit sot, Dinamos apo ndonjë ekipi tjetër nuk kanë qenë të lindur në kohën e komunizmit dhe jo më t’i fajësosh me faktin që kanë lidhje me të kaluarën. Tifozët e Tiranës ishin aq të karikuar ndeshjen e fundit ( kjo ndoshta dhe për faktin se ekipi i tyre ndodhet në fundin e renditjes) sa që lëshuan dhe akuza për të larguarit e ardhur në kryeqytet. Kjo ishte një thirrje e njohur për publikun, pasi disa javë më parë ishte zëdhënësja e Partisë Demokratike, e cila foli me përçmim për njerëzit e ardhur nga rrethet në kryeqytet.  Ky lloj komunikimi është i rrezikshëm, kur në stadium ka fëmijë, pasi një brez i ri sportdashësish mund të formohet me etikën më negative të sjelljes në grup.

Reagimi i tifozëve të Tiranës

Në “K.F Tirona” tifozët e kryeqytetit shkruajnë:  “Bëri paksa xhiro një status me demek intelektual i Erion Braçes. Më shumë prej injorancës së shprehur sesa prej asaj çka shprehej ndër rreshta. Na akuzonte për mesazhe naziste e ku di unë se çfarë?! Por çudia më e madhe ishte se kërkonte dënim nga FSHF-ja për këto thirrje naziste sipas tij, ndërkohë që ekipi për të cilin ai bën tifo ulur (sepse edhe po të ngrihet në këmbë, i ulur ngjan) çfarë simboli ka në vete stemën apo emblemën e tij që shfaqet me aq krenari nga ato pak morracakë?  Atëherë të dashur morra, në qoftë se mendoni dhe logjikoni se duhet të dënohemi Ne për mesazhe naziste, ju duhet minimumi të ndërroni emrin, stemën, dhe të gjeni një fshat, provincë apo qytet kujt t’i përkisni (kjo e fundit për të mirën tuaj).”

Ledi Shamku

“As në kohën e Petrit Dumes nuk i janë dhonë Tironës 10 kartona të verdhë dhe 1 të kuq! As në kohën e Petrit Dumes!”

Çfarë është kampi i Aushvicit

Kampi Aushvic-Birkenau ka qenë kampi nazist më i rëndësishëm i vdekjes. Sovjetikët zbuluan rreth 7 mijë persona ende të gjallë në kamp. Nga viti 1940 deri në 1945 të paktën 1,2 milion persona kanë vdekur në Aushvic-Birkenau, 960.000 prej të cilëve burra, gra dhe fëmijë hebrenj të shpërngulur nga vendet e Evropës së pushtuar nga nazistët. 75 mijë polakë, 21 mijë ciganë dhe 15 mijë sovjetikë u vranë gjithashtu në këtë kamp. Fillimisht një kamp përqendrimi për 10 mijë persona, Aushvici u shndërrua në uzinë shfarosjeje masive dhe u shtri deri në tre kilometra, u pajis me dhoma gazi të lidhur me krematoriume. Gjatë operacionit për çlirimin e kampit humbën jetën 230 ushtarë sovjetikë.