Ministria e Bujqësisë ka dërguar mostra në qendrën e referencës në Itali për të analizuar nivelin e pesticideve tek luleshtrydhet. Ministri Panariti thotë se rezultatet do të publikohen menjëherë dhe do t’i shërbejnë dhe kryqëzimit me analizat e bëra nga Instituti i Sigurisë Ushqimore dhe Veterinarisë.
“Niveli i insekticideve, pesticideve e stimulantëve është shumë herë më poshtë se niveli maksimal i lejuar, 10 deri në 20 herë, por kemi çuar mostra në shtetin italian, rezultatet vijnë çështje ditësh”, thotë Panariti.
Çështje ditësh është edhe ngritja e një laboratori në zemër të bujqësisë shqiptare, në Lushnjë, kërkesë kjo që fermerët e bëjnë prej shumë vitesh. “Kemi gjetur vendin në një nyje nevralgjike që është unaza e Lushnjës ISUV-i, ka një set pajisjesh që do na i vërë në dispozicion, por më i rëndësishëm është faktori njeri. Do përpiqem të përfshij të rinj që kanë studiuar për kimi”, shton ai.
Ministri thotë se ky laborator i posaçëm do t’i shërbejë monitorimit të inputeve bujqësore, farërave, por edhe këshillimit të fermerëve për procedurat e plehërimit apo masave mbrojtëse që mbetjet toksike të mos përçohen tek produkti.
Çështë ky titull çorientues? Kjo nuk është gazetari por diletantizëm.