Luli-Ruli dhe Lazarati në protestë

Klanet brenda Partisë Demokratike duket se nuk rrinë pa vepruar, megjithëse momenti kërkon harmoni të brendshme kundër armikut të kllasës. Mitingu i dy ditëve më parë i PD-së me shumë gjasa ka dështuar për shkak se në krye të protestës është afruar kreu i komunës së Lazaratit dhe të ardhurit nga ajo zonë me makina luksoze. Gazetarët tentuan disa herë ta pyesin zotin Dash Aliko se pse ishte në protestë dhe cili ishte statusi i tij. Basha nuk e ka kapërdirë dhe aq mirë këtë fakt dhe është munduar të shmang çdo afrim me kreun e komunës dhe për më tepër mundohej të mos dilte foto në faqen e tij në Facebook ku të shfaqej Dasho Alikaj. Por punët qenkan më të thella. Prania e Alikos në protestë paska qenë një kurth i Genc  Rulit për kryetarin e ri të PD-së. Po mor po. Këtë e thotë një mbështetës i Bashës në Facebook, i cili e këshillon kryetarin të ruhet nga rrymat brenda partisë se po i vënë shkopinj nën rrota. “Zoti  Basha pranoje që ta futi Genc Ruli dhe kundërshtarët e tjerë brenda partisë që të sollën kreun e komunës Lazarat në një proteste antidrogë.. Bëj kujdes herë tjetër se po të vënë shkopinj nën rrota…”,thotë R.K. Ndryshe nga komentet e tjerë kritikë stafi i Bashës e ka lënë këtë koment pa e fshirë. Interesante eee? Në fakt brenda PD-së, prej kohësh ekzistojnë disa rryma të cilat nuk janë aspak dakord me Lul Bashën. Një grup është i Topallit që është kundërshtare absolute e kryetarit, por vetëm prania e Berishës e frenon. Një grup tjetër është ai  i “të vjetërve” të Bodes, Rulit, Patozit, etj. dhe një rrymë tjetër ajo e deputetit të ndjerë Olldashi. Me sa duket Luli ka shumë punë përpara.