Lulzim Basha ka vetëm një hall…

Lulzim Basha ka vetëm një hall, reformën në drejtësi. Gjithçka që mbush ligjërimet e tij, liria që mungokërka për të, taksat, borxhi, korrupsioni janë kot. As që vlejnë për të! Ka vetëm hallin e madh, Reformën në Drejtësi.
Disa nga deputetët e tij janë tërhequr thuajse tërësisht nga Kuvendi dhe merren veç me këtë hall të madh të tij. Dhe kanë hak. Mendojeni, të kesh një akuzë të ngritur ligjërisht dhe të pagjykuar, të mos e kesh kundërshtuar kurrë ligjërisht, por të kesh patur gjykatësit e duhur për të të mbrojtur! Edhe njëherë. Jo avokatët e duhur ¬siç çdo qytetar në këtë vend e gjetkë, por gjykatësit e duhur. Ju e dini tashmë historinë.

Prokuroria e Republikës ngriti akuzën ndaj Lulzim Bashës dhe e dërgoi në Gjykatën e Lartë. Lulzim Basha që nuk kishte shkuar një ditë të vetme në Prokurori e që ishte mbrojtur burrërisht nga Berisha që kish ndalur Prokurorinë të sekuestronte dokumentet e Qeverisë lidhur me akuzën ndaj tij, hapi gjyq në Gjykatën e Tiranës për vlefshmërinë e akteve; gjykatësja të cilës Basha nuk ia njohu kurrë burrin, por i qan njëherë, me raste edhe dy herë në vit në shtëpi siç pardje, vendosi për pavlefshmëri të akteve, siç Basha kërkoi në Gjykatën e Lartë.

Një trup gjykuesish që duhet të shqyrtonte çështjen në themel i konsideroi vendimet e gjykatës në fjalë me forcën e ligjit. Në gjyqin tjetër, në po të njëjtën Gjykatë, dy dyer më tutje, Basha nuk u paraqit derisa edhe ai trup vendosi që, vendimet e gjykatëses në fjalë, por edhe trupit të gjykatësve në dhomën tjetër, ishin të paligjshme, por meqë ky trup gjykatësish kishin pushuar një javë më parë gjykimin e çështjes, edhe këta po vendosnin po njësoj, pa gjykuar akuzën e ngritur.
A e kuptoni çfarë halli është?! Dhe ky nuk është hall vetëm për 8 dhjetor, është hall për gjithë jetën. Mjafton që të ketë një sistem drejtësie të pavarur dhe efikas. Në fakt nuk është hall veç i tij. Është hall i kujtdo që merret me politikë e deri tani ka patur një mburojë të qartë, të fortë dhe të pakalueshme: Mburojën e pandëshkueshmërisë.