Majko: Në qershor Berisha të ikë në shtëpi të rritë nipat dhe mbesat

Në vijim të bashkëbisedimeve me qytetarët e Njësisë numër 5, katër kandidatët  në listën e Tiranës,Pandeli Majko, Blerina Gjylameti, Milena Harito,Blerina Gjylameti dhe Afrim Qëndro, gjatë “Këndit të fjalës” , të mbajtur me banorët e zonës së bllokut parashtruan pikat e programit të PS-së për mirëqeverisjen e vendit. Anëtari i Kryesisë së Partisë Socialiste, njëherësh edhe kandidat i PS-së në zgjedhjet e 23 qershorit, kërkoi  votat e qytetarëve për të ndryshuar situatën ekonomike. Më poshtë fjala e kandidatit Pandeli Majko:  Nga politikanët jeni mësuar që të dëgjoni çfarëdo lloj gjërash. Nuk kam ardhur këtu me shokët e mi që të dëgjoni ato që thuhen nëpër televizione. Ne jemi miq. Fushata jonë bazohet tek ajo që ne afrojmë. Partia Socialiste duhet të vijë në pushtet si një kontratë e madhe. Nuk vijmë në pushtet vetëm për socialistët, por do të vijmë në pushtet edhe për ata që nuk do të na votojnë, edhe për ata që do të jenë në pakicë pas 23 qershorit. 23 qershori nuk do të jetë vetëm një votë për të ndryshuar qeverinë. 23 qershori do të jetë një ditë e madhe kur ne të majtë dhe të djathtë do të vendosin se ku do të shkojë Shqipëria. Më 23 qershor duhet të bëhet gati të iki në shtëpi dhe të rris nipat dhe mbesat. Ky është mesazhi jonë për Sali Berishën. Flitet me zë të lartë se janë rritur investimet, pagat. Por, mirë, a e dini sa është rritur buka , vaji, mielli, sheqeri? Qeveria duhet ta mbante borxhin publik në 50 për qind, por se ka as 51 , as 52, por mbi 63 për qind.  Ndryshe nga 97’ nuk do të ketë piramida si Sudja apo Xhaferri, pro piramidën e kemi brenda. Shqipëria nuk është si ‘97, por një vend i falimentuar nga keqqeverisja. E pranon ose nuk e pranon. Kjo nuk do të kalojë thjesht me fjalë. Në parlamentin e ardhshëm një nga detyrat do të jetë hetimi i falimentimit të financave shqiptare me apo pa dashje.
Askund nuk do të bëhet përsëritja e gabimeve të PD-së që me paratë e taksapaguesve , të themi si PD-ja që ky është ndërtimi ynë. Pushtetarët janë thjesht administratorë. Ne e quajmë veten të majtë sepse kemi një histori, e dimë nga vijmë dhe e dimë se nga shkojmë. Por kam një pyetje për ata që votojnë sot të djathtën. Çfarë është sot e djathta? Shikoni pak listën e Partisë Demokratike. Përveç Visar Zhitit shikoni ndonjë tjetër? A është listë apo një jetimore ku janë mbledhur të gjithë politikanët që për një apo shumë arsye janë kthyer apo rikthyer në parti, pasi janë përzënë dhe janë rivënë nga lideri i tyre.
Mbi të gjitha ne jemi një ekip. Në listën e sigurtë jam unë, por këtu me mua është edhe Afrim Qëndro, një kandidat tjetër. Nuk dëshiron që të flasë shumë nëpër takime apo të bëjë zënka me njëri, por vetëm për një rast është gati të bëjë sherr: po u prekën votat më 23 qershor, s’ka fjalë. Këtu është e edhe Alfred Dalipi , i cili është një socialist i cili nuk përmbysi kupën. Fredi është një mik i joni i cili ka mendjen në kokë dhe zemrën majtas që është duke dhënë një ndihmë të jashtëzakonshme për fitoren e zgjedhjeve”, u shpreh Majko.