Xhudistja kosovare, Majlinda Kelmendi, ka fituar medaljen e argjendtë në turneun Gren Slem të Parisit. Gara është më e madhja e vitit sa i përket Kupës Botërore. Kelmendi ka zënë vendin e pestë në dy vitet e mëprshme. Në finalen e zhvilluar në prani të rreth 20 000 shikuesve, Majlinda pësoi humbje nga xhudistja japoneze, Juki Hashimoto. Majlinda në xhiron e parë ishte e lirë, kurse në xhiron e dytë për herë të katërt e mposhti finlandezen Sundberg, për t’u kualifikuar në çerekfinale, ku arriti ta mposhtë francezen, Delsalle, me ippon. Në gjysmëfinale Majlinda mposhti japonezen Takuma Mijakava. Në finalen kundër Hashimotos, pas një lufte të madhe asnjëra garuese nuk arriti gjuajtje, çka bëri që gjyqtarët ta dënojnë Majlindën, dënim që vetëm gjyqtari kryesor e kishte parë dhe kësisoj japonezja fitoi medaljen e artë, kurse Majlinda u detyrua të kënaqet me medaljen e argjendtë. Gjithsesi, ky është një sukses i madh, pasi është medalja e parë e arritur në një Gren Slem. Majlinda me këtë medalje fitoi 300 pikë në renditjen botërore dhe sipas të gjitha gjasave do të zërë vend në pesë xhudistet më të mira botërore. Në këtë garë mori pjesë edhe Nora Gjakova. Ajo shënoi fitore në xhiron e parë kundër francezes Shirli Elliot, kurse në xhiron e dytë u ballafaqua me japonezen, Jamamoto. Nora luftoi mirë, por megjithatë humbi, pasi japonezja është njëra nga më të mirat në botë. / Bota sot