Klubi i Malagës ka reaguar shumë i zemëruar pas gabimeve në gjykim të para në ndeshjen kundër Borusias në Dortmund, të cilat sollën humbjen 2-3 në minutat shtesë dhe kualifikimin e gjermanëve në gjysmëfinale. Skuadra vendase shënoi dy gola në shtesë, duke përmbysur disavantazhin 1-2, por goli i tretë ishte në pozicion të dukshëm jashtë loje. Presidenti Al Thani lëshoi që në përfundim të ndeshjes akuza të rënda, të cilat iu adresuan UEFA-s. “Dua që të hapet një hetim nga UEFA. Ajo që ndodhi nuk është futboll, por racizëm kundër Malagas”, shkroi menjëherë në Twitter sheiku i Malagës. Zemërimit të bosit i bëri jehonë edhe trajneri Manuel Pelegrini. “Në shtatë minutat e fundit nuk kishte asnjë arbitër në fushë. Është e natyrshme, për UEFA-n një skuadër që është ndëshkuar nuk mund të luajë në finale”, tha kiliani. Deklarata e tij i referohet faktit që Malaga është dënuar të mos marrë pjesë në Champions League në katër vitet e ardhshëm, në rast kualifikimi, pasi nuk ka respektuar kriteret e Fair Play-t financiar të UEFA-s. Tani klubi spanjoll e ka humbur besimi tek UEFA dhe këtë e thotë kapiteni Joakim, autor i golit të parë: “Pas kësaj mbrëmjeje, dyshojmë te Platini dhe të gjitha ata që bëjnë pjesë në UEFA. T’i bësh këto gjëra ndaj Malagas është e thjeshtë. Nëse do të ishim Real Madrid, nuk do të kishin ndodhur kurrë”. Megjithatë, pavarësisht akuzave të spanjollëve, vlen të përmendet fakti se Malaga ishte duke fituar takimin me një gol gjithashtu jashtë loje, i cili solli epërsinë 2-1 shtatë minuta para përfundimit.