Relacioni për shkarkimin e Malajt, BSH injoron kërkesën e Qeverisë

Ekzekutivi ka propozuar pezullimin nga detyra dhe shkarkimin e një anëtari të rizgjedhur të Këshillit Mbikqyrës të BSH pa u mbushur një nga 7 vitet e mandatit të tij.

Pas kësaj Këshilli Mbikëqyrës i Bankës së Shqipërisë (që është kundër) është atakuar për herë të parë publikisht nga qeveria.

Ndonëse në daljet publike në krah të Guvernatorit, kryeministri kishte cituar pavarësinë dhe balancat e Bankës së Shqipërisë, nisma e fundit për shkarkimin e Arben Malajt ka acaruar marrëdhëniet.

Rruga ligjore që është zgjedhur është e diskutueshme.

Siç shkruhet në relacionin e vendimit për shkarkimin e Malajt, “Kuvendi i ka kërkuar Këshillit Mbikëqyrës dhe si rrjedhim anëtarëve të Këshillit Mbikëqyrës të Bankës së Shqipërisë që të analizojnë aktet e miratuara nga vetë Këshilli Mbikëqyrës dhe të shprehen në lidhje me vendimmarrjen në Këshill ose individualisht. Por rezulton se pas më shumë se dy muajsh, nuk ka asnjë reagim dhe as ndonjë procedurë të nisur për shqyrtimin e pikës së rezolutës që kërkonte reagim institucional apo individual as nga Këshilli Mbikëqyrës, as nga anëtarët e Këshillit Mbikëqyrës”.

Qeveria është e zhgënjyer me sjelljen e Këshillit duke e quajtuar këtë si “refuzim i hapur i respektimit dhe zbatimit të ligjit”.

Relacioni ka një hapësirë të dedikuar për sjelljen publike të ish-ministrit socialist të financave.

Qeveria është koshiente se po bën interpretime për të gjetur hapësirë për shkarkimin e z. Malaj.

Propozimi për shkarkimin e anëtarit të Këshillit Mbikëqyrës të Bankës së Shqipërisë, sipas ligjit, i takon shumicës së anëtarëve të Këshillit Mbikëqyrës.

“Por mund të arsyetohet që në zbatim të dispozitave të Kodit të Procedurave Administrative, kur një detyrë nuk zbatohet apo refuzohet të zbatohet nga zyrtari i ngarkuar nga ligji, atëherë kompetenca mund të ushtrohet drejtpërdrejtë nga organi që ka detyrimin ligjor për të vendosur në lidhje me çështjen” – këmbëngul qeveria në relacionin e vet.

Si konkluzion, Këshilli i Ministrave i propozon Kuvendit të Republikës së Shqipërisë shkarkimin e z. Arben Malaj nga detyra e anëtarit të Këshillit Mbikëqyrës të Bankës së Shqipërisë.

o.j/dita