Rrëshqitjet masive të dheut kanë shkaktuar shembjen e 11 shtëpive në fshatin Ngracie, në komunën Qendër të Mallakastrës. Dhjetëra banorë të këtij fshati janë detyruar të dalin të alarmuar nga shtëpitë gjatë natës së mbrëmshme. Ndërkohë, situata nuk është më e mirë as në banesat e tjera, të cilat janë plasaritur dhe rrezikojnë shembjen. Gjendjes emergjente i është shtuar edhe shembja e rrugës që lidh fshatin me komunën, duke lënë të izoluar 400 banorë. Ndërsa banorët janë strehuar nëpër të afërmit e tyre, ata tregojnë makthin e natës së kaluar, kur toka u rrëshqiti nën këmbë.
“U ngritëm të alarmuar, kur na tha kunati dilni nga shtëpitë të shpëtojmë si njerëz, se ikëm. Shtëpitë janë shkatërruar komplet, nuk janë më të banueshme”, tha një banore.
“Na u këput kolona e shtëpisë, dolëm të gjithë jashtë që të mos na zinte brenda. Ne duam ndihmë të nxjerrim plaçkat”, tha një tjetër banor për NEWS 24.
Ndërkohë, mësohet se për të inspektuar situatën e krijuar, në Ngracie kanë mbërritur dy ministrat Sokol Olldashi dhe Flamur Noka. Ata kanë kërkuar largimin e banorëve, në mënyrë që të mos rrezikohen jetë njerëzish.