Konfederata e Industrisë kërkon që të rishikohet paketa fiskale e vitit të ardhshëm.
Duke iu drejtuar komisioneve parlamentare ku ka nisur diskutimi për këtë paketë, Konfindustria vlerëson se drafti është në kundërshtim me interesat e zhvillimit të qëndrueshëm ekonomik të vendit, prodhimit vendor, mjedisit të biznesit dhe pengues edhe për vete synimet afatshkurtra buxhetore të Qeverisë.
“Ndërlikimi i tejskashem i sistemit fiskal me përjashtimet mbështetur në parimin e dështuar të qarkullimit vjetor ne nen dhe mbi 5 dhe 8 milion leke/vit, qe shumëfishon trysninë për evazion fiskal dhe korrupsion, shtimi i taksave të reja si 10% e primit te sigurimeve pa prekur rregullimin e sektorit, vendosja e taksës ndaj makinave të ashtuquajtura “luksoze” pa marrë parasysh vlerën e tyre, goditja ndaj masave mbrojtëse te prodhimit vendor dhe favorizimi i importeve në industri te rëndësishme, etj., flasin qarte për problematiken e draftit të paketës fiskale 2016 dhe domosdoshmërinë e përmirësimit të saj”, thuhet në deklaratën e shpërndarë të dielën nga Konfindustria.
Sipas deklaratës, dy vitet e fundit, paketa fiskale ka dështuar në rritjen e Prodhimit të Brendshëm Bruto si dhe ka goditur fuqinë konkurruese të vendit tonë për tërheqjen e investimeve të huaja. /Dita/