Manjani: Hapësira ajrore e sigurt, problemet e tokës mos i ngrini në ajër

Zëvendësministri i Transporteve, Ylli Manjani, siguron opinionin publik se hapësira ajrore e Republikës së Shqipërisë është e sigurt dhe e monitoruar sipas standardeve absolute.

Në një deklaratë për mediat sot në mesditë, Manjani theksoi se nuk ka asnjë mundësi për deviacione, ngjarje të rënda apo trafik droge nga ajri.

“Siguroj opinionin publik shqiptar se hapësira ajrore e Republikës së Shqipërisë është më e sigurta që ka kjo Republikë në krahasim me çdo sektor tjetër të transportit. Standardet e sigurisë dhe monitorimit janë absolute. Nuk bëhet fjalë për deviacione, ngjarje të rënda, për asnjë lloj mundësi të trafikut. Ngjarja e djeshme konfirmon 120% se kjo hapësirë është e sigurtë. Për shkak të këtyre standardeve të sigurisë u zbulua edhe ngjarja e djeshme. Po të ishte kaq e pasiguritë sigurisht nuk do ishte zbuluar asgjë. Siguroj gjithë opinionin publik se kjo hapësirë është e siguritë. Monitorohet 24 orë në 24 nga Albcontorl. Është institucioni që administron kullën. Çdo mjet që fluturon në hapësirën e Republikës së Shqipërisë është i identifikueshëm nga kjo kullë. Sigurisht hetimi do sqarojë shumë gjëra, por na rezulton se ky rast ka qenë i gjurmuar që nga toka dhe deri në tokë.”- u shpreh Manjani.

Sipas zv/ministrit Manjani, “problemet e tokës nuk duhen ngritur në ajër”.

“Se çfarë ka ndodhur është çështje e hetimit, policimit, strukturave të tjera që duhet të sqarojnë rrethanat. Problemet e tokës nuk kemi pse t’i ngremë në ajër, ajri është i sigurt, kulla siguron hapësirën ajrore, kullat e tjera, qoftë edhe ato të opozitës, ne nuk mundemi t’i kontrollojmë.”- deklaroi zv/ministri.