Diego Armando Maradona ka fituar betejën me drejtësinë italiane. Legjenda e futbollit akuzohej nga autoritetet fiskale italiane për evazion, duke e akuzuar për një dëm prej 40 milionë eurosh ndaj shtetit. “Maradona tashmë është një njeri i çliruar nga makthi dhe përndjekja e autoriteteve fiskale që kërkonin me të padrejtë dëmshpërblim në shuma marramendëse. Pas kësaj fitoreje, ai po shqyrton mundësinë e padisë ndaj autoriteteve italiane për prishje të imazhit dhe karrierës së tij në gjithë këto vite përndjekje”, deklaroi në fund të gjyqit, avokati Angelo Pisani. Maradona dhe dy ish-futbollistë të tjerë të Napolit, brazilianët Careca dhe Alemao akuzoheshin për mashtrim në shitjen e të drejtave të imazhit të tyre për shoqëri jashtë Italisë në fund të viteve ’80.