Marian Kola u vra në tokën shqiptare?

Kohën kur Marian Kola u vra nga policia greke, policia shqiptare “sulmon” Vigun nga dy rrugët që të fusin në këtë zonë; nga Vau i dejës dhe nga zona e Kreshtës, mali që ndan Lezhën me Shkodrën, gjeografikisht. Kjo ndodhi rreth mesnatës duke u gdhirë dita e diel, kur forcat e shumta policore kanë hyrë nga Zadrima. Informacioni është dhënë, nga banorë të zonës, të cilët thonë se përjetuan ankth e panik kurse dy helikopterë të panjohur prej tyre kishin patrulluar zonën. Pas mjeteve fluturuese, kishin mbërritur fouristrada, me targa të huaja, me xhama të zinj dhe me punonjës policie të gjithë të maskuar. Fshatarët nisën të flasin pas disa dyshimeve se Kola mund të jetë vrarë në territorin shqiptarë, por që këto mbeten vetëm thashetheme rurale. Ato zënë shkas tek mënyra se si kanë ecur makinat e policisë, me prozhektorë të ndezur dhe se pas disa minutash janë  dëgjuar krisma arme.

Helikopterët mister

Lëvizjen e helikopterëve dhe të mjeteve e konfirmojnë edhe nga Policia e Lezhës, aty ku duket se zë fill thashethemi i fshatarëve të Vigut. Diku, mbi kodër, në afërsi të Kreshtës janë dëgjuar të shtëna armësh, ndërsa banorët e zonave nga frika kanë vendosur të mbyllen nëpër shtëpi. Informacionet që vijnë nga banorët e fshatrave të Lezhës që janë përballur me zhurmën policore atë natë dhe orëve të para të mëngjesit të së nesërmes tregojnë se nuk dinë në të vërtet se çfarë ka ndodhur. Ata mbajnë mend se edhe ditën tjetër në fshat kanë mbërritur dy makina policie, por shqiptare. Njëri nga shoferët që është ndalur në një lokal fshati, mësohet ti ketë thënë baristit të fshatit se gjithçka që kishin patur ndërmend e kanë kryer mbrëmë (një natë më parë). Pikërisht për orën kur bëhet fjalë se policia greke ekzekutoi të arratisurin nga burgu. Të kontaktuar nga policia e Lezhës e justifikoi ndërhyrjen me helikopter nëpër ato zona, si kontroll për parcela me hashash nëpër zonën e Kallmetit e deri në Mnelë  e Vig, ndërsa burimet nga policia e shtetit treguan se operacioni i Forcave të Ndërhyrjes së Shpejtë nëpër ato zona lidhej me tentativën për të zbuluar personat që i zunë pritë makinës së pukjanëve në Qafë-Çelë. Ky operacion i pretenduar nga Policia e Shtetit, pretendohet gjithashtu edhe nga Policia e Shkodrës. Madje asnjë nga këto institucione nuk ka pranuar se është bërë kontroll në shtëpinë e Kolës dhe të  familjarëve të tij. Ndonëse vetë njerëzit  e viktimës janë dëshmitarë për mësymjen policore, për këtë nuk ka asnjë deklaratë  zyrtare.

Bastisja e shtëpisë se Marian Kolës 

Ndonëse asnjë informacion nuk pason atë terror që ka ushtruar policia jonë (jo ajo greke) në fshatin Vig dhe në familjen e Marian Kolës, të dhënat që vijnë nga shtëpia e viktimës së plumba dhe urrejtjes së policisë greke bëjnë me dije se natën kur është vra djali i tyre, ata janë shoqëruar në policinë e Shkodrës. Detajet që vijnë nga rrëfimet e tyre tregojnë se i ati dhe xhaxhai janë shoqëruar në polici, ndërsa kanë qenë në ambientet e komisariatit kur  janë njoftuar për vrasjen e djalit të tyre. Familjarët e Marian Kolës tregojnë se  djali i tyre, në kohën kur është vrarë vajza greke në atë shkëmbim zjarri që policia helene pretendon se e ka vrarë Mariani, ai ka qenë në Shqipëri. Mariani ka qëndruar gjatë në zonën e vet, në familjen e tij dhe  më pas, është nisur në drejtim të Greqisë. Gruaja e tij është njeriu që ka shoqëruar  të shoqin çdo ditë për tre javë rresht.