Marko Mengoni ka fituar edicionin e 63 të Festivalit të Sanremos. Me një mbështetje të jashtëzakonshme të publikut nga shtëpia, Mengoni ka marrë edhe vlerësimin e jurisë, duke u renditur i pari ndër fituesit e festivalit më të njohur të muzikës italiane. Këngëtari që u zbulua si talent në “X Faktor” ka triumfuar me këngën “L’esenziale”, ndërsa në vendin e dytë është renditur Elio e le Storie tese, me këngën ‘La canzone mononota’, këngë që ka rrëmbyer edhe çmimin e kritikës “Mia Martini” dhe atë të arranxhimit më të mirë, ndërsa në vend të tretë është pozicionuar grupi “Modà” me këngën ‘Se si potesse non morire’.
Nata finale është dominuar nga të ftuar VIP, mes të cilëve këngëtari me famë ndërkombëtare, Andrea Boçeli, i cili e ka nisur karrierën pikërisht nga kjo skenë.
Ndërkohë, festivali është ndjekur nga një numër shumë i madh telespektatorësh. Mbi 13.6 milionë spektatorë e kanë ndjekur natën finale të festivalit, i cili është drejtuar gjatë tre netëve të tij nga Fabio Facio dhe Luciana Litizeto. Kjo është audienca më e madhe që prej vitit 2000. / Përgatiti: Gazmira Sokoli