Me urimin që të gjithë shqiptarët të jenë të bashkuar si sot në Sheshin e Flamurit, marshuesit e nisur ditë më parë nga Kosova, janë bërë pjesë e festimeve dhe ngritjes së flamurit.
Atë që nuk mundi ta bënte 100 vjet më parë Isa Boletini me delegatët e tjerë, e kanë bërë në mënyrë simbolike një grup marshuesish nga Kosova, të cilët të veshur me kostume popullore e të hipur mbi kalë kanë nisur ditë më parë rrugëtimin e gjatë nga Presheva për në Vlorë.
Ata janë bërë pjesë e ceremonisë së ngritjes së flamurit, ku përmes një fjalimi të shkurtër, një përfaqësues i tyre ka uruar për bashkim të të gjithë shqiptarëve, një bashkim që duhet të ketë për model ditën e sotme.
“Ne nuk bëmë asgjë. Ne sollëm amanetin e dëshmorëve që kanë dhënë jetën për këtë tokë. Uroj që ky popull të jetë i bashkuar siç është sot”, tha njëri prej përfaqësuesve.