Martohet ambasadorja e BE-së në Shqipëri. Ceremonia në Malin e Zi pa të ftuar nga Tirana

Jemi mësuar të dëgjojmë për dasma vipash e politikanësh, por asnjëherë për një dasmë diplomati.

Ndoshta se në përgjithësi diplomatët janë më të rezervuar prej profesionit dhe shumë pak dihet për jetën e tyre personale.

Fati e deshi që krejt rastësisht të mësoja për dasmën e rrallë të ambasadores së BE-së, Romana Vlahutin. Reagimi i parë ishte uau!

E para se vetëm para pak javësh shkrova në Dita një portret të paautorizuar rreth saj por edhe të disa marrëdhënieve të brishta si velloja që ajo ka vënë për herë të dytë.

Më duhet të rrëfej publikisht se pas atij shkrimi pata disa mesazhe që linin të kuptohej se ambasadores nuk i kish pëlqyer që ishte folur për të në media.

Vlahutin nuk dihet pse, por ka zgjedhur të mbajë larg median në jetën e saj profesionale dhe personale po e po.

Por ne e dimë historinë e mollës së ndaluar dhe çfarë i ndodhi botës prej kuriozitetit, ndaj jemi këtu sërish me një lajm këtë herë thellësisht rozë.

Lajmin për martesën e dytë të ambasadores e pashë si diçka të bukur, aq interesant sa ta ndaja edhe me lexuesit e gazetës “Dita”.

Ambasadorja Vlahutin ka vënë kurorë para 3 javësh në Mal të Zi në një ceremoni tërësisht private.

Nuk ka ftuar askënd nga delegacioni në Tiranë si dhe asnjë politikan apo mik shqiptar.

Shumë pak informacion dihet në Tiranë për vendin dhe nuk kemi mundur të sigurojmë asnjë foto, por lajmi për martesën konfirmohet edhe nga shokët e shoqet e klasës të së bijës së ambasadores.

E vogla është në klasë të dytë fillore në një nga shkollat private më prestigjioze në Tiranë.

Nuk zbulohen dhuratat e nuses, por ato kanë qenë të shumta.