Rikthehen diskutimet midis mazhorancës dhe opozitës për reformën në drejtësi

Partia Socialiste ka bërë një kthesë në lidhje me reformën në drejtësi, duke tërhequr draftin paraprak të propozuar prej saj çka solli edhe bojkotimin e mbledhjes së grupit të punës nga ana e ekspertëve demokratë.

Sipas News 24, ekspertët e mazhorancës dhe të opozitës do të rifillojnë punën duke u bazuar tek rekomandimet e Komisionit të Venecias.

Me këtë vendim të mazhorancë, rihapen negociatat midis opozitës dhe partive në pushtet.

Thelbi i diskutimeve ka të bëjë me rolin e ministrit të drejtësisë dhe mënyrën e zgjedhjes së gjykatësve që do të drejtojnë apo do të jenë pjesë e institucioneve të reja që do të krijohen.

Pika më e fortë kundërshtuese e opozitës ka të bëjë me votimin e 84 votave në Kuvend, vota të cilat mazhoranca i ka aktualisht.

“Prokurori i Përgjithshëm emërohet me tre të pestat e anëtarëve të Kuvendit, mes tre kandidatëve të propozuar nga Këshilli i Lartë i Prokurorisë. Këshilli i Lartë i Prokurorisë përzgjedh sipas një procedure transparente dhe publike dhe bazuar në merita dhe rendit tre kandidatët më të kualifikuar, të cilët gëzojnë reputacion të lartë.

Nëse Kuvendi nuk emëron Prokurorin e Përgjithshëm brenda 30 ditëve nga paraqitja e propozimeve, kandidati i renditur më lart nga Këshilli i Lartë i Prokurorisë konsiderohet i emëruar. Procedura e përzgjedhjes dhe emërimit të Prokurorit të Përgjithshëm parashikohet me ligj”, thuhet në draftin e ekspertëve të nivelit të lartë.

Edhe pse Venecia nuk e konsideronte domosdoshmëri ndërprerjen e mandatit të kryeprokurorit aktual Adriatik Llalla, komisioni i qëndron variantit që prokurori të qëndrojë në detyrë deri në emërimin e prokurorit të ri brenda dy muajsh nga konstituimi i Këshillit të Lartë të Prokurorisë. /Dita/