Mbaron mandatin, Becaj: Gjykata është penguar në administrimin e drejtësisë

Më 23 mars kryetares së Gjykatës së Lartë, Shpresa Beçaj i përfundon mandati në krye të këtij institucioni. Kryetarja e Gjykatës së Lartë deklaroi se deri në momentin e emërimit dhe fillimit të mandatit të kryetarit të ri të kësaj gjykate, drejtimin e saj në funksion të zbatimit të Kushtetutës se Republikës së Shqipërisë dhe ligjit “Për organizimin dhe funksionimin e Gjykatës së Lartë të Republikës së Shqipërisë” do ta ushtrojë anëtari i kësaj gjykate Besnik Imeraj, njëkohësisht Kryetar i Kolegjit Civil.  Largimin e saj ajo e ka paraqitur përpara trupës gjyqësore. Në fjalën e saj ajo është shprehur se Gjykata e Lartë është përballur me problematika të cilat kanë penguar dhe vazhdojnë të pengojnë përmirësimin e eficencës së kësaj gjykate në kuadër të administrimit të drejtësisë. Për shkak të kompetencave të gjera që ajo ka, Gjykata e Lartë vazhdon të jetë e mbingarkuar me gjykimin e çështjeve nga më të thjeshtat deri tek ato më të komplikuarat, të cilat kanë sjellë si rezultat vonesa të ndjeshme në gjykimin e çështjeve. “Krahasuar me vitin 2011, rezulton se pranë Gjykatës së Lartë gjatë vitit 2012 janë regjistruar rreth 581 çështje më shumë, me një efekt në rritjen e pervitshme të numrit të çështjeve gjyqësore të pashqyrtuara, i cili arrin në 9961 çështje”, deklaroi Beçaj gjatë takimit me kolegët e saj. Znj. Beçaj nuk la pa përmenduar faktin se qëndrimi në pritje për një kohë të gjatë i miratimit të ndryshimeve të pritshme të ligjit organik të Gjykatës së Lartë, dhe mos marrja parasysh e vërejtjeve dhe sugjerimeve të propozuara nga Trupa e Gjykatës së Lartë në draft, vonesa në hartimin e ndryshimeve shumë të pritura në kodet e procedurave, nuk e ka favorizuar punën e këtij institucioni.