Mbi 300 të vrarë në Gaza, shumica civilë

11 palestinezë kanë mbetur të vdekur gjatë sulmeve të Izraelit sot në Rripin e Gazës, duke e çuar kështu në 321 bilancin e viktimave gjatë 12 ditëve të ofensivës izraelite.

Ministria vendase e Shëndetësisë raporton se dy të tretat e viktimave janë civilë, ndërsa numri i të plagosurve ka arritur në 2270.

Në zonën e nxehtë pritet të mbërrijë sot sekretari i përgjithshëm i Kombeve të Bashkuara, Ban Ki-moon, në përpjekje për të negociuar rreth ndalimit të sulmeve.

Hamas: Njerëzit tanë kanë hyrë në Izrael

Ndërsa ushtria izraelite u ka kërkuar refugjatëve që ndodhen në kampet e Gazës të largohen për të mos u prekur ga luftimet e ditëve të ardhshme, Hamas ka bërë të ditur se ka arritur të futet në Izrael.

“Njerëzit tanë janë atje dhe po luftojnë”, ka thënë  Brigate Ezzedin al-Qassam, që njihet si krahu i armatosur i Hamasit.

Izraeli: Do të zgjerojmë me operacionin në tokë

Izraeli ka bërë të ditur se do të vijojë me operacionin në rrugë tokësore në Rripin e Gazës. Objektivi i këtij operacioni mbetet sipas tij vënia nën kontroll e tuneleve përmes të cilëve bëhet e mundur kontrabanda e armëve dhe infiltrimi i terroristëve.