Mbi peticionin e “personaliteteve” pa personalitet

Vendosa të shkruaj këtë shkrim si reagim ndaj një të ashtuquajturi peticion kundër opozitës si thirrje për të votuar tre ligjet që pengojnë integrimin. Këtë unë e kuptoj nga njëra anë si dritëshkurtësi  e qorrollepsje intelektuale po më shumë e më saktë si një mercenarizëm, servilizëm, hipokrizi e përpjekje për mbështjellje “intelektuale” për pushtetin injorant e dëmsjellës publik, autokratik e kundërintegrues në këmbim të ndonjë përfitimi punësimi të tyre e përfitimi tjetër për fëmijët apo të afërmit.

Ky peticion ngjason me një “hartim” politik që të sjell në mëndje edhe një të tillë të bërë 3 vite më parë kundër Greves së Urisë së Opozitës për liri, drejtësi e transparencë e motivuar moralisht e politikisht kundër korrupsionit e vjedhjes së votës, e po përsëri  shoh si dhe atëhere edhe tani  se ju bindën urdhërit ca sejmenë e që  në vazhdim ju shtua dhe kompania e mjekëve të Prof. Adhamudh Kryeministrit. Kjo sërë nënshkruesish të kujton intelektualët nxënës të Zhdanovit stalinist, enverizmit marksist, kulturalizmit maoist e gebelsjanizmit nazist në shërbim  e himnizim të diktaturave, po ky i juaji pak më i moderuar sepse i përshtatet sot dhe pushtetit autokrat maskuar me pak modernitet të krijuar nga miliardat e vjedhura popullit.

Tashmë dihet se alibia  e tre ligjeve për të fajësuar opozitën si bllokuese e Statusit të Antarit Kandidat për në BE ka rënë dhe është diskredituar publikisht dhe ndërkombëtarisht,  po atë vazhdon ta përdorë kryeministri si gozhdën e Nastradinit për të mashtruar opininin e sfilitur dhe në të cilën fatkeqësisht janë varur dhe luhaten mediat e blera dhe kjo sërë intelektualësh mjeranë e mercenarë. Këtë sërë intelektualizmi e lidh me lidershipin në pushtet formësimi i tyre komunist antiperëndimor, i konvertuar sot në një “pro-perëndimorizëm antikomunist”; e politikës së vetizolimit ideologjik, konvertuar sot në vetëizolim pseudodemokratik e korruptiv. Këta janë trashëgimtarë dhe inspirues të përndjekjes dhe luftës së klasave, pjesëmarrës dje dhe sot në neglizhencën mashtruese e kriminale ndaj shtresës së të përndjekurve dhe manipulimit me  kompensimin e padrejtësive të së shkuarës .

Ku është morali i asaj që ju as nuk i shkruat një rresht qeverisë  të paktën për dialog, po heshtët, siç heshti e neglizhoi paturpësisht qeveria  për sakrificën me vetdjegien në protestën e urisë së të përndjekurve politikë? Përpara se të na hiqeni si “intelektualë që nuk  të falni” për tre ligje, pastrojeni shpirtin dhe mposhtni servilizmin e egoizmin; kini dhimbsuri e ndjeshmëri për shoqërinë; për vuajtjet e njerëzve nga skamja, papunësia, padrejtësia, korrupsioni etj.

Kulmi i hipokrisë së këtij peticioni arrin aty kur atij duan t’i japin motivim dinjiteti, ndershmërie, në një kohë që e ndershme, e virtytshme, dhe e moralshme do të ishte t’i  drejtoheshit Qeverisë me protesta apo peticione (e jo për një po për dhjetra arsye) si shkaktare e prapambetjes demokratike, moszhvillimit ekonomik e mosintegrimit. Jo! Opinioni dhe ndërgjegjja qytetare nuk e pranon “ shqetësimin” tuaj të maskuar intelektual dhe përveç këtyre unë gjykoj se motivimi që ju shtyn për të goditur Ramën ka brenda edhe inferioritetin tuaj intelektual karshi tij. Nuk e ka bllokuar integrimin opozita apo Rama me tre ligjet, po është bllokuar tërë sistemi demokratik  e politik , civil e juridik, ekonomik brenda dhe eurointegral.

Ju me të drejtë përmendni në “hartimin” tuaj politik se duhet të fitojmë mbi gurët në rrota, mbi pabesitë dhe bllokimet, po mosekspozimi i tyre ju komprementon intrigën dhe hipokrizinë. Ju jeni viktima të pushtetit dhe thoni vetëm dëshirimet e justifikimet e tij. I doni gurët, pabesitë, bllokimet apo pritat siç i quani? Jua themi ne, nëse nuk i dini: 1- korrupsioni,si  vëndi më i korruptuar në Europë. 2-varfëria, si vëndi më i varfër në Europë. 3- papunësia, si populli me përqindjen më të lartë të papunësisë, me mbi 47% të moshës 18-64 vjeç . 4- borxhi publik dhe çmimet e papërballueshme.  5- si vëndi me gjysmëdemokraci dhe pjesërisht i lirë. 6- si vëndi pa standarte demokratike dhe pa zgjedhje të lira e të pamanipuluara. 7-vëndi ku  është kapur shteti nga pushteti dhe ku gjyqësori  bën korrupsionin, jep padrejtësinë dhe shkakton vetëgjyqësinë. 8- vëndi ku gëlojnë krimi ordiner, elektoral e politik, pasiguria juridike për jetën e pronën. 9-genocidi ekologjik me degradimin urban dhe rural me ndotjet e paimagjinueshme të tokës, ujit, ajrit dhe shkatërrimet e veprave bonifikuese, bukurive natyrore, turistike dhe trashëgimisë kulturore dhe monumenteve historike. 10-keqpërdorimi, grabitja dhe trafikimi e spekullimi me pasuritë dhe interesat kombëtere për interesa të ngushta pushteti.

Mjaftojnë besoj vetëm  këto si kundërargumente për të rrëzuar e diskredituar avokatinë tuaj “intelektuale” argumentit të fabrikuar  nga pushteti , atë të mosvotimiit të “tre ligjeve” që pengojnë integrimin.  Dhe këto  që përmënda më lart dhe të tjera janë “meritë” e qeverisë dhe jo e E.Ramës. Në mbyllje përsëri them se jam “dakord”me ju që nuk doni që Shqipëria të jetë një popull i humbur, po unë e di (ashtu siç e dini dhe ju) se populli humbet më së shumti  vetëm kur dhunohet, mashtrohet dhe keqqeveriset nga papërgjegjshmëria e korrupsioni, dhe shëmbulli apo modeli më i mirë  i keqqeverisjes në historinë e shtetit tonë është qeverisja e sotme.

Popujt bëhen kombe të fortë kur ata mënçurohen  dhe janë të guximshëm e të gatshëm për të përballuar e sfiduar vështirësitë dhe intrigat; dhe jo të binden, t’iu nënshtrohen atyre dhe të pajtohen me të keqen. Frikacakët, të shtirurit, servilët, hipokritët, ata që shiten e blihen lirë për interesa të ulëta pushteti, janë ata që shesin të vërtetën, intelektin dhe personalitetin. Nga këta çfarë nuk pritet si e keqe!

*Autori është bashkëpunëtor i faqes së komenteve në DITA, autor i librit “Triumfi i Kombit”