Mblidhet komisioni i posaçëm për drejtësinë, Braho: Mbështesim draftin por kemi disa rezerva

Komisioni i posaçëm parlamentar për reformën në drejtësi është mbledhur sot me praninë në komision edhe të deputetëve të opozitës. Anëtarët e komisionit do të diskutojnë rreth draftit të grupit të ekspertëve dhe më pas do të paraqesin propozimet e tyre.

Në emër të Partisë Lëvizja Socialiste për Integrim, deputeti Spartak Braho shprehu qëndrimin se reforma në drejtësi duhet të bëhet me konsensus. Ai theksoi se largimi nga konsensusi do të thotë shpërfillje e opinionit të Venecias.

“LSI kërkon vazhdimin e dialogut, ai është mjeti, konsensusi është rruga ku duhet të arrijmë, nuk vëmë te konsensusi profesional pa dialog, jo konsensus i allishverisheve, jo i pazareve, por profesional, duke vazhduar pa ndërprerje dialogun dhe ai bëhet këtu, në tavolinë jo duke u larguar nga tavolina, unë e ritheksoj edhe njëherë këtë kërkesë dhe nuk kam arsye të mos përshëndes ardhjen e opozitës dhe kam përshtypjen që edhe ata do të vazhdojnë të jenë aktivë në procesin e dialogut”, tha Braho.

Megjithëse parimisht LSI e mbështet draftin, deputeti Braho tha se partia e tij ka disa rezerva. “Ndahemi te sistemi i karrierës, duam që ai të jetë thelbi. Kemi mendim ndryshe për mandatin e institucioneve, riformulim tjetër për zgjedhjen e anëtareve të Kushtetueses, opsion tjetër për organizimin e Gjykatës së Lartë, ajo duhet te jetë një dhe e vetme, kemi gjykim tjetër lidhur me organizimin e prokurorisë si një organ te unifikuar. Nuk mund të këtë struktura te tjera qe raportojnë në Kuvend për sa kohë që këtë e bën Prokurori i Përgjithshëm dhe duam rritje të rolit aktiv të Ministrit të Drejtësisë”, tha ai.

Në emër të Partisë Demokratike, deputeti Eduard Halimi rikthesoi edhe një herë qëndrimin kundër kapjes së sistemit të drejtësisë nga policia.

“Ekziston vullnet i mirë për draft të reformës kushtetuese bazuar në rekomandimet e Venecias dhe prania jonë e tregon këtë.

Por a di ndonjë si u ulën, si u bënë, kur doli drafti parafabrikat, kush i dha urdhër ekspertëve, ata i marrin detyrat nga ne, nuk venë konsultohen në kafe, as ne, as qytetarët nuk e dinë, as mediat nuk e dinë, as grupet e interesit nuk e dinë, kjo tregon vullnetin e keq për ti cimentuar politikisht ekspertët”, tha Halimi.

Për opozitën, drafti i propozuar ikën nga këshillat e Komisionit të Venecias. “Duhet të shkojë në të njëjtën linjë me rekomandimet për një draft ku implementohen një më një rekomandimet, mos të fshihemi pas ekspertëve”, tha ai. /Dita/