Irani ka urdhëruar mbylljen e një gazete të përditshme, e cila botoi në kopertinë një histori të shkurtër dhe foton e George Clooney, i cili në kostumin e tij kishte vendosur një mbishkrim në mbështetje të Charlie Hebdo.
Gazeta “Mardom e-Emruz” publikoi foton e aktorit në Golden Globes me titullin “Edhe unë jam Charlie“.
Mohammad Ghoochani, kryeredaktor i gazetës, i tha agjencisë së lajmeve Tasnim se kjo gazetë ishte e detyruar të mbyllej.
Edhe pse gazeta nuk shprehte mbështetje për Charlie Hebdo apo komentet e yjeve të Hollivudit, gjyqtarët e quajtën titullin të “turpshëm”.
Qeveria e Iranit dënoi sulmin në zyrat e Charlie Hebdo dhe gjithashtu edhe revistën, duke thënë se karikaturat e botuara të Profetit Muhamed ishin “provokuese” dhe një fyerje ndaj Islamit.
Në një deklaratë, Ashraf Ghani, presidenti afgan, i quajti fotografitë e Profetit blasfemuese dhe të papërgjegjshme.
“Liria e shprehjes duhet të përdoret në një mënyrë të atillë që të rritë mirëkuptimin mes feve.
Afganistani ka vuajtur për shumë vite nga lufta dhe dhuna, më shumë se çdo vend tjetër, ndaj është e nevojshme të kuptohet dhe promovohet bashkëjetesa paqësore midis njerëzve në gjithë botën“, – tha ai.