Erion Habilaj – DITA
Nga dje, në oborrin e Kryegjyshatës Botërore të Bektashinjve, do të lulëzojë një pemë ulliri më shumë.
Gjatë një ceremonie të zhvilluar dje, në 60-vjetorin e lindjes së tij, Kryegjyshi Botëror Bektashian, Hirësia e Tij, Haxhi Dede Edmond Brahimaj, mbolli një pemë ulliri në mjediset e Selisë së Shenjtë në kujtim të myrshidit të tij dede Reshat Bardhi, duke bërë ndërkohë përurimin e vendosjes së pllakës “Sheshi Reshat Bardhi”, emër që do të mbaj këtej e tutje kjo “qytezë” e bukur.
Gjithçka, që në një farë mënyre ishte dhe një surprizë për Dede Edmond Brahimajn, u përgatit në detaje nga Jetmir Bodini, drejtor administrativ i Kryegjyshatës Botërore Baktashiane, bashkë me një grup klerikësh bektashianë e besimtarë.
“Ishte një eveniment me synim dhënien e mesazheve të paqes, mirësisë, dashurisë e harmonisë që predikon besimi bektashian, një vlerësim për dede Reshat Bardhin, Kryegjyshin Botëror Bektashian që ka meritë të veçantë në ringritjen e bektashizmit pas ndryshimeve të vitit 1990, rindërtimin e objekteve bektashiane në Shqipëri e jashtë sajë, ndërkohë dhe një vlerësim për Kryegjyshin Botëror Bektashian sot, Hirësinë e Tij, Haxhi Dede Edmond Brahimaj, për punën dhe përpjekjet e vazhdueshme që vazhdon të bëj në përmbushje të amaneteve të lëna nga myrshidi i tij, duke çuar më tej dritën e mirësisë, shpresës, paqes e dashurisë në miliona besimtarë bektashian në mbarë botën e shumë dashamirës të këtij besimi”- shprehet për “Dita” Jetmir Bodini, drejtor administrativ i Kryegjyshatës Botërore Bektashiane.
Në vazhdën e këtij evenimenti, sot, në mjediset e Selisë së Shenjtë Bektashiane, me rastin e 60 vjetorit të ditëlindjes së Dede Edmond Brahimajt, ka pritje vizitash që nga ora 10:00 dhe një sërë aktivitetesh që kulmojnë në orën 19:00 të së dielës.
Kush është Haxhi Dede Edmond Brahimajn
Haxhi Dede Baba Edmond Brahimaj ka lindur në Tiranë më 19 maj 1959, prej prindërish besimtarë të devotshëm të bektashizmit, me origjinë nga fshati Brataj i Vlorës. Pas mbarimit të shkollës 8-vjeçare, vazhdon studimet në shkollën e mesme ushtarake “Skënderbej” dhe duke arritur rezultate të larta i jepet e drejta të ndjekë studimet e larta ushtarake, në Akademinë e Forcave Tokësore, sot “Skënderbej’. Nga viti 1982 dhe deri më vitin 1990 ka shërbyer në funksione të ndryshme ushtarake, në Burrel dhe Peshkopi. Me ringjalljen e besimit bektashian në fund të viteve 90-të së bashku me klerikë dhe besimtarë të tjerë, merr pjesë në Këshillin Organizativ të Selisë së Shenjtë të Kryegjyshatës Botërore Bektashiane.
Në fillim të vitit 1991 me kërkesën e tij lirohet nga funksionet ushtarak duke marrë përsipër barrën për organizimin e Komunitetit Bektashian. Vlen të theksojmë se edhe në kushtet më të vështira, atëherë kur ushtrimi i besimit fetarë në Shqipëri u ndalua me nen të veçantë të Kushtetutës, shtëpia e prindërve të tij në Tiranë ka shërbyer për mbajtjen gjallë të bektashizmit duke u rrezikuar shumë prej regjimit që nuk falte.
Më dy janar të vitit 1992 merr dorë tek udhëheqësi i tij shpirtëror, Haxhi Dede Reshat Bardhi dhe Baba Barjam Mahmutaj, duke u inkuadruar kështu përfundimisht në rrugën e Pirit të ndritur Haxhi Bektash Veliut.
Më 16 maj 1996 konsakrohet me urdhrin “Dervish” dhe ngarkohet me detyrë në Gjyshatën Bektashiane Korçë, në teqenë e Turanit. Puna e palodhur e tij për kontinutetin dhe ringritjen e besimit bektashian në Librazhd, Pogradec, Mokër, Korçë, Devoll dhe Kavajë, bëri që më 13 prill të vitit 1997, të dekretohet me titullin “Baba”.
Pas kalimit nga kjo jetë e baba Bajram Mahmutaj, caktohet si zëvendës i parë i Kryegjyshit Botëror Bektashian, Haxhi Dede Reshat Bardhi.
Në këtë funksion të lartë kontributi i tij ka qenë i çmuar sidomos në ideimin, përgatitjen dhe realizimin e tri kongreseve të radhës të bektashizmit. Madje në dy kongreset e fundit ( Tiranë 2000 dhe 2005) ka raportuar në cilësinë e përgjegjësit të Këshillit të Lartë Gjyshëror. Në marsin e vitit 2006, me kalimin nga jeta të Baba Tahir Eminit, gjithashtu emërohet në funksionin e gjyshit të gjyshatës bektashiane në Maqedoni.
Kontributi i tij në këtë gjyshatë ka qenë sa në rrafsh të organizimit të komuniteteve të besimtarëve atje, edhe në aspektin e njohjes prej ndërkombëtarëve. Si në Korçë edhe në Tetovë, Haxhi Baba Edmond Brahimaj ka manifestuar cilësitë e spikatura të klerikut bektashian në aspektin doktrinor, moral dhe qytetar duke u shndërruar në faktorin të tolerancës fetare midis besimeve të tjera. Në vitin 2004 për kontributin e çmuar të tij Këshilli Bashkiak i Qarkut të Korçës e ka nderuar me titullin më të lartë “Nderi i Qarkut të Korçës”.
Aktivitetet e Dede Brahimajt
Dede Edmond Brahimaj, udhëheqës i miliona besimtarëve bektashianë në gjithë botën, si klerik me aftësi teologjike e intelektuale, ka merita të veçanta dhe të vlerësuara në rritjen e rolit të këtij tarikati në të mirë të besimtarëve e simpatizantëve, duke kontribuar ndjeshëm në forcimin e besimit në Zot, në forcimin e dashurisë mes njerëzve pa dallim feje, ngjyre e etnie, në forcimin e harmonisë, mirësisë e paqes universale. Që nga viti 1992 e në vazhdim Haxhi Baba Edmond Brahimaj ka marrë pjesë në trajnime të organizatave prestigjioze ndërkombëtare, kurse doktrinore, simpoziume dhe veprimtari të ndryshme me karakter fetar, human dhe social, ku edhe ka referuar duke çuar aty zërin dhe eksperiencat e komuniteteve bektashiane të kudondodhura në botë.
Kështu më 1996 referoi në Teheran lidhur me tolerancën bektashiane në trevat e Ballkanit. Më 14 qershor 2003, në Konferencën Ndërkombëtare “Fetë dhe Civilizimet në mijëvjeçarin e ri”, referon rreth sfidave të bektashizmit në të ardhmen.
Në qershor 2004, në kuadër të trajnimeve të organizatës të Komuniteteve fetare tradicionale shqiptare, viziton shtëpinë e Bardhë në SHBA. Nga bordi i kësaj organizate ka merituar titullin “Ambasadori i Paqes”. Ka shkuar në SHBA nën përkujdesjen e Departamentit të Shtetit dhe Ambasadës së SHBA në Shqipëri, për një periudhë 21 ditore, lidhur me problematikat e diversitetit të fesë. Ka marrë pjesë disa herë në festimet e 16 gushtit në Haxhi Bektash të Turqisë, ku është pritur nga drejtues të lartë të shtetit turk si edhe ata të Institutit “Haxhi Bektash Veliut” pranë Universitetit të Gazit në Turqi. Gjithashtu, ka qenë i pranishëm dhe ka kontribuar me ligjëratat e tij në veprimtari analoge në Tiranë, Shkup, Prishtinë, Ohër, Stamboll, Ankara, Afiyon, Shtutgart, Keln, dhe në Detroit të SHBA -ës.
Dede Edmond Brahimaj, është pjesëmarrës në pelegrinazhin Botërore për Haxhillëk në Mekë, vitin 2004. Merr pjesë në vizitat e vendeve të shenjta në Jeruzalem në Izrael, në vitin 2007.
Ka qenë i ftuar në Kongresin e 33 Botëror për “Liritë Fetare” në Indi dhe ka ndezur pishtarin të këtij aktiviteti së bashku me udhëheqësin e shquar fetar Dalai Lama. Ka marrë pjesë në tri konferenca Botërore mbi fenë në Maqedoni nga viti 2006-2011.
Në CV-në e tij përfshihen dhe studimet për Juristikën në Universitetin Shtetëror të Tetovës, në Maqedoni. Kleriku Brahimaj, më 11.06.2011, zgjidhet në postin e lartë të Kryegjyshit Botëror të Bektashinjve. Këto vite si Kryegjysh Botëror i Bektashinjve, Hirësia e Tij, Haxhi Dede Edmond Brahimaj, ka punuar me përkushtim duke vazhduar rrugën e Dede Reshatit Bardhit, traditën bektashiane në marrëdhënie institucionale brenda dhe jashtë vendit.
Ka patur gjatë kësaj periudhe drejtimi një agjendë të ngjeshur në veprimtaritë e ndryshme ndërkombëtare nëpër botë. Në vendet e Ballkanit ka patur mjaftë takime me presidentët, me të Turqisë, Bullgarisë, Rumanisë, Hungarisë, Greqisë, Maqedonisë, Kroacisë, Sllovenisë, Bosnjë-Hercogovinës, Kosovës etj.
Por takimet nga më kryesoret janë: Takimi me përfaqësuesit e Këshillit të Evropës për çështjet fetare në vitin 2012; takimi me personalitete të lartë të Turqisë, Kryeministrin Erdogan, Presidentin turk dhe përfaqësueset e lartë të Komunitetit Mysliman të Turqisë në vitin 2013; pjesëmarrës në Konferencën për 100 vjetorin e Shoqërisë “Vatra” në vitin 2013; takim me personalitete të Shtëpisë së Bardhë në SHBA me sekretarin e Shetit Xhon Kerri më 2013; Konferenca Botërore për paqe në Pejë të Kosovës, viti 2013; vizitë në vendet e shenjta të Irakut në qytetin Nexhef, Qerbela, Kufe, Bagdat, prill 2014; pjesëmarrja në Samitin për paqen në Seul shtator 2014; takimi me Papa Françesku në Tiranë 21 shator 2014; pjesëmarrja në veprimtarinë ndërkombëtare për një paqe mes popujve, 9-12 tetor 2014, Palermo-Itali; pjesëmarrja në Marshimin e Bardhë me përfaqësues të katër komuniteteve fetarë të Shqipërisë në Parisë të Francës, në janar të vitit 2015; bëri të mundur realizimin e amanetit të Dede Reshat Bardhit në përurimit madhështor të Kryefaltores Bektashiane në Tiranë me pjesëmarrje nga personalitete nga shumë vende të botës më 7 shtator të vitit 2015; takimi me Papa Françesku më 10 maj, 2016 në Vatikan; më 17 qershor 2016, merr pjesë në inaugurimin e bustit të “Nënë Terezës, në provincë të Mynihut, organizim i Shoqatës Kulturore “Sali Çekaj”; 4 shtator 2016 mer pjesë në Shenjtërimin e Nënë Terezës, në Romë-Itali; takimi me Patriakun Ekumenik i Stambollit, Bartolomeu i Parë në Stamboll të Turqisë shtator 2016, ku këtë muaj Akademia Botërore e Paqes të OKB i jep titullin “Doctor Honoris Causa”; më 9 tetor 2016, merr pjesë në ceremoninë e shpalljes “Kardinal” të shqiptarit të përvuajtur Dom Ernest Troshanit; m22 mars 2017, në “Dita e Sulltan Nevruzit” organizon manifestim madhështor ndërkombëtar sipas ritualeve bektashiane, e ndjekur nga 27 televizione nga vende të ndryshme të botës; më 25 maj 2017, është organizatori i vitit të dytë ”Ditën e Kulturës Bektashiane” në Paris të Francës; në qershor të vitit 2017, merr pjesë në “Mëngjesi i lutjeve” në Berlin të Gjermanisë; po këtë muaj organizon veprimtarinë madhështore të 500 vjetorit të veprës Ballëm Sulltanit Pirit të Dytë të bektashizmit, Tiranë-Martanesh; në shtator 2017, merr pjesë në Konferencën e tretë të liderëve fetarë për paqen botërore në Seul të Koresë së Jugut; më 14 tetor në Shkup të Maqedonisë, është organizator i Konferencës Ndërkombëtare me temë: “The Bektashi religoeus community urder premime” relator dhe i ftuar nderi ka marrë pjesë Josef Weinerholster, nën kryetar i Parlamentit Europian; në tetor 2017, takim në Bruksel për problemin e teqesë Harabati Baba të Tetovës me anëtarë e PE dhe Reporterin e BE-s për Shqipërinë, Knut Fleckentein; pjesëmarrja e tij në Konferencën Ndërkombëtare rreth religjioneve, kulturës pluraliste për paqen e qëndrueshme në Lindjen e Mesme, Athinë Greqi 30 tetor 2017; në nëntor 2017, merr pjesë në ceremoninë e ngritjes së bustit të “Nënë Terezës” në Kroaci, së bashku me Presidentin e Republikës së Shqipërisë, z. Ilir Meta, ku takon dhe bisedon me z. Stipe Mesiç; në janar 2018, merr pjesë në Berlin, Konferenca Ndërkombëtare “Iraku pas fitores mbi shtetin islamik”, organizuar në bashkëpunim me zyrën e Evropës të dialogut midis feve; 7 shkurt 2018 është organizator i jubileut të 480 vjetorit të themelimit të teqesë Harabati Baba, Tetovë -Maqedoni, pjesëmarrje nga ambasadat e akredituara në Maqedoni, përfaqësues të OSBE-s, intelektual, profesorë nga vende të Ballkanit dhe Shqipëria, ku me këtë rast u bë prezantimi i ekspozitës fotografike në këtë event të rrallë; veprimtaritë në Maqedoni, Shkup, mbi njohjen e Vendimit të Gjykatës së Strazburgut për tu njohur Komuniteti Bektashian në Maqedoni, veprimtari në Zvicër, Ankara e në shumë shtete e vende të tjera..