“Me Shtetet e Bashkuara nuk na ndan asgjë dhe na bashkon gjithçka”

Takimi midis kryeministrit Edi Rama dhe sekretarit amerikan të Shtetit, është shoqëruar me një konferencë shtypi.

Kreu i qeverisë shqiptare sqaroi pikat ku kishte diskutuar me sekretarin Kerry, duke përmendur veçanërisht reformën në drejtësi për të cilën Rama tha se është historike për vendin dhe mbështetja e SHBA-ve në këtë drejtim e bën me të sigurt zbatimin e saj.

Një pjesë nga deklarata e Ramës:

Shqiptarët i janë besnikërisht mirënjohës Shteteve të Bashkuara. Pa mbështetjen dhe këshillat e çmuara të SHBA-ve, Shqipëria nuk do të kishte bërë kaq shumë progres.

Ishte kënaqësi dhe krenari për mua të informoja sekretarin Kerry për reformat që po ndërmerr Shqipëria. E informova për reformën në drejtësi, një reformë kyçe për Shqipërinë.

U jam mirënjohës Shteteve të Bashkuara veçanërisht për punën e palodhur të ekspertëve amerikanë për hartimin e reformës. Objektivi ynë është që marsi të jetë koha e miratimit të paketës kushtetuese në Kuvend. Fakti që na mbështesin Shtetet e Bashkuara, e bën të mundshëm këtë reformë historike për Shqipërinë.

Me Shtetet e Bashkuara nuk na ndan asgjë dhe na bashkon gjithçka.

Trupat tona do të vazhdojnë misionin e tyre në Afganistan dhe do të qëndrojnë aty deri kur të jetë e nevojshme.

Ne jemi të angazhuar kundër terrorizimit ndërkombëtarr dhe luftën kundër ISIS. E informova sekretarin Kerry për legjislacionin që Shqipëria ka marrë në këtë drejtim.

Ne kemi informuar SHBA-të për përpjekjen tonë për të futur në tekstet shkollore informacionet për fetë dhe kjo do të luftojë terrorizmin.

Një prej pikave të bisedës ishte siguria energjetike.