Mediu-Bashës: Po bën pazare me PS-në për Durrësin, do dalim vetëm

Në prag të zgjedhjeve lokale, kanë nisur pakënaqësitë e para në radhët e opozitës. Kryetari i Partisë Republikane, Fatmir Mediu, duket se është i pakënaqur me kreun e PD-së Lulzim Basha sa i takon përzgjedhjes së kandidatit për Bashkinë e Durrësit.

PR-ja prej kohësh ka deklaruar se deputeti Agron Duka është emri i duhur për të kandiduar në qytetin bregdetar në zgjedhjet vendore, por Mediu ka pohuar se sjellja e Partisë Demokratike me aleatët nuk duket e konsoliduar.

Kësisoj, Mediu paralajmëron, se nëse bëhen pazare politike për Durrësin, PR-ja mund të garojë e vetme më 21 qershor.

“Mendoj se është një gabim jashtëzakonisht i madh nga ana e PD, pasi nuk do ta quaja neglizhim që deri tani nuk kemi një diskutim konkret sesi duhet, jo vetëm me PR, por me të gjitha partitë e tjera të angazhohemi për të fituar zgjedhjet lokale, – tha Mediu. – Nëse Durrësi mendohet se mund t’i lihet pazarit të PS dhe sekserëve të PS, atëherë kjo është një çështje që na vendos ne si PR në një pozicion moral shumë të diskutueshëm”.

Menjëherë pas këtij qëndrimi, Partia Demokratike ka bërë të ditur se do të thërrasë ditën e mërkurë në orën 17:00 një takim me të gjitha forcat politike të djathta.