Kreu i Partisë Republikane është takuar sot me mbështetës të kësaj force politike në Fushë-Krujë. Gjatë takimit, kryetari Fatmir Mediu u shpreh se politikë do të thotë t’i japësh mundësi çdo qytetari për të bashkëpunuar në ndërtimin e të ardhmes së vendit. Sipas Mediut, partia e të cilit është aktualisht pjesë e koalicionit qeverisës, perspektiva europiane është rruga e vetme që i jep vlerë jetës së çdo shqiptari, prandaj politika ka për detyrë të dëgjojë me vëmendje zërin e çdo qytetari.
“Ky 100-vjetor duhet të kthehet në një moment të thellë reflektimi, politik, shoqëror dhe kombëtar. Reflektim politik për të kuptuar përgjegjësitë tona kombëtare, për të kuptuar se jemi zgjedhur për t’i shërbyer njerëzve të thjeshtë, banorëve të Fushë-Krujës e gjithë Shqipërisë. Të dëgjojmë me vëmendje zërin e tyre, problemet që ata kanë. Politika nuk është të kontrollosh, të dominosh, por është t’i japësh mundësi çdo individi, çdo qytetari të thjeshtë për të ndërtuar të ardhmen e familjes së tij, për të bashkëpunuar për të ndërtuar të ardhmen e kombit shqiptar. Duhet të kemi vizon të qartë që perspektiva evropiane është rruga e vetme që i jep vlerë jetës së çdo shqiptari”, është shprehur Mediu gjatë takimit me republikanët e Fushë-Krujës.