Mënyra e zgjedhjes nuk bind parlamentarët evropianë, por bind von Der Leyen

Grupet politike të parlamentit evropian janë bashkuar për të dënuar mënyrën e zgjedhjes së presidentes  të Komisionit Europian, duke e quajtur këtë proces jodemokratik.

Udhëheqësit e BE zgjodhën Ursula von der Leyen për të zëvendësuar Jean-Claude Juncker si udhëheqës i degës ekzekutive të Bashkimit Evropian, pavarësisht faktit se ajo nuk ka qenë në fletën e votimit si kandidat për parlamentin europian dhe nuk kishte një mandat.

Gonzalez Pons, zëdhënësi i grupit të qendërs së djathtë EPP, në të cilën edhe CDU e kancelares Angela Merkel është pjesë, ndër të tjera tha: “E ardhmja e Evropës nuk mund të vendoset më pas dyerve të mbyllura. Procesi nuk ka të bëjë me një person apo një emër – qytetarët e Evropës duan të zgjedhin personin që qeveris Evropën. Kjo nuk është revolucionare, kjo është demokraci”.

Po kush është presidentja e re e Komisionit Evropian?

Ursula von Der Leyen është vajza e një politikani. Në fakt, i ati, Ernst Albrecht, ka qenë ministër dhe president i Saksonisë së Poshtme, si dhe një politikan shumë i njohur në Gjermani në vitet ’90.

E diplomuar në Mjekësi, Der Leyen e ka nisur karrierën politike 18 vjet më parë, kur mori fillimisht një mandat lokal pranë rajonit të Hanoverit dhe më pas u zgjodh deputete në Landtagun e Saksonisë së Poshtme, në shkurt 2003. Kalimi në ekzekutiv ndodhi një vit më pas. Më 4 mars 2003 ajo u zgjodh Ministre e Çështjeve Sociale, e Grave, e Familjes, dhe e Shëndetësisë e Saksonisë së Poshtme. Në nëntor 2005 von Der Leyen kaloi në qeverinë qendrore, e thirrur nga Merkel për të mbuluar detyrën e Ministres së Familjes.

Gjatë mandatit të saj ka promovuar politika sociale për mbrojtjen e familjes, duke nisur nga çerdhet si dhe të drejtat e nënave që punojnë. Eshtë shfaqur gjithmonë si një mbështetëse e të drejtave dhe kuotave të grave.

E lindur në 1958, e martuar me mjekun dhe sipërmarrësin Heiko von der Leyen, gruaja që sot do të udhëheqë Komisionin Evropian është nëna e shtatë fëmijëve, të lindur mes viteve 1987 dhe 1999.

Në vitin 2009 Ursula von Der Leyen u rikonfirmua fillimisht si ministre e Familjes, por më pas kaloi si Ministre e Punës dhe Çështjeve Sociale, pas dorëheqjes së Franz Josef Jung. Në dhjetor 2013 Ursula von Der Leyen emërohet ministre e Mbrojtjes, e para grua në Gjermani që mbulon këtë rol.

Në maj 2016 u bë protagoniste e një ndryshimi rrënjësor të strategjisë të menaxhimit të forcave të armatosura gjermane. Ajo shpalli rekrutimin e mijëra ushtarëve të rinj në ushtri, duke rritur sidomos praninë e tyre në kufi me Rusinë, për t’i dhënë siguri vendeve të Evropës lindore, anëtarë të NATO-s, që ndiheshin në rrezik pas aneksimit të Krimesë nga Rusia dhe konfliktit në Ukrainën Lindore.

Në vitin 2017 akuzoi gjeneralët për “dobësi në drejtim” të ushtrisë duke u gjendur kështu në qendër të një përplasjeje me drejtuesit ushtarakë dhe skandalit që pasoi, kur në disa kazerma u gjetën materiale që i përkisnin Vermahtit, forcave të armatosura naziste. Kritikave ministrja iu përgjigj me shpalljen e një reforme të madhe që do të garantonte më shumë investime për mbrojtjen.

Janë këto vecori, si duket, që e bëjnë Ursula von Der Leyen kryesisht të pëlqyer për europianët e pyetur në sondazhe të ndryshme, përvec faktit që ajo është e para grua që merr detyrën e presidentes të KE, raporton Dita, duke iu referuar mediave ndërkombëtare.

e.ll./dita