Meta: Antivlerat sociale, të luftohen me forcë

Presidenti Ilir Meta ka deklaruar sot se antivlerat sociale duhen luftuar me forcë.

Meta, i cili ka marrë pjesë në prezantimin e studimit “Toleranca Fetare në Shqipëri”, ka thënë se e vlerëson nismën e fundit të krerëve të bashkësive fetare në Shkodër për ndërgjegjësimin e komunitetit, për vlerësimin e familjes, si dhe për kundërvënien ndaj veseve.

Sipas Metës veset si droga, bixhozi dhe bastet po gërryejnë vlerat e familjes, dhe prandaj gjendet në krah të bashkësisë fetare në sensibilizimin e institucioneve shtetërore.

“Në këtë kontekst vlerësoj se ky studim është serioz dhe vlen për reflektime. Anketime të tilla na duhen si referencë në punën tonë të përditshme, por dhe në të ardhmen. Gjithashtu punime të tilla vlejnë edhe si instrumente vlerësimi të aktualitetit në vendin tonë edhe nga partnerët ndërkombëtarë”, shtoi Meta.

Gjithashtu, Meta tha se bashkëpunimi i bashkësisë fetare, institucioneve të shoqërisë civile, institucioneve të organizatave ndërkombëtare në vend së bashku me institucionet shtetërore të vazhdojë të fuqizohet akoma dhe më shumë, për një të ardhme sa më të mirë.

s.a/dita