Meta: AP e Dojakës do jetë një nga surprizat e 23 qershorit

Lëvizja Socialiste për Integrim dhe Aleanca Popullore nisin bashkëpunimin si dy parti aleate të koalicionit të majtë, duke prezantuar strategjinë e përbashkët për të maksimalizuar votat në zgjedhjet e 23 qershorit. Në një konferencë të përbashkët shtypi, dy liderët e partive aleate, Ilir Meta dhe Artur Dojaka, u shprehën se koalicioni i majtë është koalicioni më i gjerë i realizuar ndonjëherë në vend që prej rënies së komunizmit. Meta tha se Aleanca Popullore është një aleat me vizion konstruktiv.

“Aleanca Popullore ka një vizion tepër konstruktiv. Është një forcë  që si prioritet kryesor të saj  ka afirmimin  e çështjes  çame  dhe zgjidhjen e  saj, kjo në kuadër të integrimit evropian. Është një forcë që jam i bindur se  do të jetë një nga surprizat e këndshme  të 23 qershorit. Do të japë  një kontribut të rëndësishëm për realizimin  e atij rotacioni të domosdoshëm dhe aq të rëndësishëm për të ardhmen e vendit tonë. Dihet se  Aleanca për Shqipërinë Evropiane  përfaqëson  koalicionin  më të gjerë të realizuar ndonjëherë në vendin tonë në këto dekada pluralizmi politik”, u shpreh Meta.

“Ne e filluam përpjekjen tonë në vitin 1991 me krijimin e Shoqatës “Çamëria”. Kemi vënë zemrën tonë, mundësitë tona dhe gjithçka tjetër në shërbim të një kauze që është amaneti i shenjtë i të parëve tanë. Çështja Çame duhet të bëhet çështje e shtetit shqiptar. Çështja çame nuk çohet përpara duke mbetur brenda kornizave të një komuniteti, sado i madh që të jetë ai. Ajo duhet të bëhet një çështje kombëtare dhe si e tillë, ajo duhet të adaptohet nga shteti shqiptar dhe strukturat e tij, duke filluar nga qeveria. Prandaj jemi sot pjesë e këtij koalicioni fitues, “Aleanca për një Shqipëri Europiane”. Eshtë pa dyshim në nderin e Parlamentit Shqiptar miratimi i Rezolutës  për Çamërinë. Jemi pjesë e këtij koalicioni fitues që kjo Rezolutë të kalojë në Kuvendin e ri, jo me marifete dhe falsifikime, por si vullnet i qartë dhe dinjitoz, me konsensus të të gjithë përfaqësuesve politikë të vendit, në koordinim të plotë me faktorin ndërkombëtar – tha Dojaka