Meta hedh hapin i pari: Transparencë për çdo financim të LSI-së

Kush nuk zbaton ligjin do të dënohet. Deklarata bëhet nga kryetari i Kuvendit, Ilir Meta, ku apeli i drejtohet përfaqësuesve të partisë së tij në administratë.

Gjatë mbledhjes së kryesisë, Meta vuri theksin tek transparenca.

“Në këtë kontekst LSI kërkon nga të gjithë përfaqësuesit e saj në të gjitha nivelet të zbatojë ligjet e  shtetit. Asnjë sugjerim apo ndërhyrje nga cilido, në kundërshtim me ligjin jo vetëm që nuk zbatohet, por është i dënueshëm dhe nëse ndodh do merren masa ndëshkuese. Të distancohen nga çdo praktikë korrupsioni dhe abuzimi me detyrën. Shoqëria ka nevojë  të nxitet dhe të thellohet transparenca ndaj publikut dhe çdo shfaqje arrogance dënohet nga LSI. Transparenca është e vetmja rrugë që realizohet dhe forcohet besimi i qytetarit dhe i shoqërisë ndaj institucioneve”, thekson Meta.

Kreu i LSI-së deklaroi se partia e tij do të bëjë publike të gjitha të ardhurat, gjë që partitë nuk i kanë bërë të ditura prej më shumë se 20 vitesh dhe transparenca e financimeve është kërkuar vazhdimisht nga raportet e OSBE/ODIHR-t.

“Për sa i përket financimit të partisë duke qenë se financimi i saj është një element themelor i transparencës duhet t’i japim një përgjigje të qartë. Duke vendosur nga sot e në vazhdim që çdo e thënë për financimin e partisë do jetë trasnaprente nga kushdo që të njihet nga ky proces. Në faqen e internetit të LSI do të jetë një opsioni i veçantë “Financat dhe buxheti i LSI” ku do të shfaqen të ardhurat nga kuotat e anëtarësisë nga buxheti i shtetit apo KQZ, donacionet dhe çdo formë e të ardhurave”, tha ai. /Dita/